十幾年無返教會，估唔到今日會參與到呢一場有今生無來世嘅主日崇拜！

想當年，團契、主日崇拜我都例必出席，直到一日，我再無法喺教會得到歸屬感，亦厭倦咗教友嘅虛偽嘴臉之後，我決意離開教會。

喺剛過嘅星期日（10月19日）下午，我到旺角留守，醒起4點好似有一場主日崇拜，喺彌敦道馬路中間搞崇拜喎，點都要見識下！好在，去到剛好開始唱詩歌。

參與者有三至四十人左右吧，由一位幪面嘅牧者（？）領詩，大家圍住張摺枱坐喺馬路上，後面企咗啲唔知係教友定圍觀者；摺枱上有十字架、有耶穌基督畫像，仲有一個爆咗頭嘅基督像。我咬住份三文治（耶撚朋友大概會賜我一個不敬嘅罪名^^）開始久違了嘅主日崇拜。

詩歌之後到一位戴住頭盔嘅傳導人講經文，幪面牧者加戴頭盔嘅傳導人，咁嘅組合邊度搵！最勁都唔係呢度，幪面牧者一問之下先知道，原來除咗未信嘅人同基督徒之外，竟然有幾位天主教徒（可惜無東正教）！全世界教會都做唔到嘅「合一」，竟然喺呢個小小嘅香港，一條MK嘅馬路上達成咗！雨傘革命果然係充滿奇蹟。

一般教會行聖餐禮都會用一片圓形白色餅仔嚟領聖體，所以當幪面牧者攞左一條提子包出嚟時，即時全場噴笑！至於寶血嘛，我地杯都無，唯有將每人分到嗰粒指甲大小小嘅提子包點一點寶血就算嚕。

旺角佔領區嘅教堂喺17號早上清場時被拆，今日又重新坐落喺佔領區嘅馬路上；爆頭嘅基督像、摺枱、提子包......所有嘢都好簡陋，牧者傳道人造型搞笑，儀式又隨隨便便，不過又如何？我哋帶住最虔誠嘅心，衷心禱告，祝福呢場雨傘革命嘅參與者能夠平安，祈求呢場有今生無來世嘅運動創造更多奇蹟，阿們。