就等我「老土」一下鄭智。葉鴻輝話鄭智「好波」但「無品」。其實佢又點算「好波」？

鄭智初出道時被中國傳媒捧到上天，話係「亞洲最全面球員」、「通天老倌」、甚至「中國碧根鮑華」我都聽過。但佢落選 2002 世界盃名單（當時佢係中國足球先生），跟住去歐洲搵食又無乜佳作。雖然話打過英超，不過都係細球會查爾頓。論華人足球員，曼城嘅孫繼海一定比佢有代表性。鄭智去到蘇格蘭些路迪好快又要打道回府，當時仲係佢最當打時期。

至於佢早兩年攞「亞洲足球先生」仲好笑，可能中國球迷打飛機，會以為兩年前鄭智好真係波過日本嘅本田圭佑同香川真司啦。不過，你要知道幾年前亞洲足協改例，只頒獎俾可以響亞洲出席頒獎禮的球員，即係所有喺歐洲搵食（即亞洲最好、最當打）嘅球員都好大機會無份。當日本同韓國大半隊都喺歐洲搵食，你攞得呢個獎，反而證明你先唔係真正嘅「足球先生」呀。打個比喻，CCTVB 勁歌金曲只頒獎俾肯出席嘅自己友。林峯攞幾次最受歡迎男歌手兼金曲獎，咁佢嗰幾年一定唱得過陳奕迅啦？

一個幾年前當打時期仍被歐洲放棄嘅球員，又有幾「好波」呀？而家鄭智運動生涯步入晚期，但你諗番吓，佢除咗射失幾個重要嘅十二碼，喺國際賽又真係無乜代表作。除此之外，外國傳媒印象中嘅鄭智，係脾氣暴躁、出名茅、成日攞牌。

但就算畀你好波過美斯喇，你又吐口水，又話人係狗。咁無球品又點？更何況今日的你，只係一個二、三流球員。

（J2截圖）