呢個五一黃金週，自由行明顯少咗。條街鬆動咗，行街好耐冇試過咁舒服了。

成日都聽到有人講，香港冇咗自由行會死。我成日都有一個疑問：呢句話嘅意思，係咪即是講，香港除咗做自由行生意之外，就冇本事冇能力做其他嘅生意同行業？

我反而覺得，2003年之後，中央政府開始放自由行落香港，做自由行生意成為咗最「就手」嘅選擇。呢個城市將大量資源放咗落去最「就手」嘅 option 上面，從此大家就懶得再諗呢個 option 以外嘅選擇，直至有一日呢個最就手嘅商機 backfire。

我唔信香港冇咗自由行會死，香港本來就係國際城市，唔係淨係靠賺一個國家同地區嘅錢去生存。但係當最就手嘅選擇仍然存在喺度嘅時候，呢個城市嘅商人要的得起心肝轉型，機會好微。

就係咁樣，大家都不自覺將所有雞蛋放入同一個籃裡面，讓經濟逐步逐步地依賴單一國度，忘記以往自己嘅求生本能，然後有些「聰明人」不斷地提醒大家：「我哋如果冇咗XX就會死啦……」

我哋唔喜歡有部份國內人面對港人有種「恩主心態」，但本土香港人當中，其實都有唔少將我哋呢個地方，悲觀地睇成「必須被接濟才能生存」嘅夕陽城市。每次聽到我哋自己人都喺度講啲類似「冇咗某某接濟香港就死硬」嘅話，我總係覺得，點解要咁冇志氣？我哋係咪已經放棄咗自己？


English version of this article is available:
http://hkcolumn.blogspot.hk/2014/05/ck-most-pathetic-thing-for-hongkongers.html