近期政治新聞啲花生炒完一獲接一獲，煙駁煙咁款：又齊昕出走、又走鹽走糖委員會、又三跑錢夠買百九幾億午餐肉掟亡國興咁，好睇程度勝C1更勝HKTV。之但係屬於政界嘅奇人奇事，不得不提下成為一時熱話既呢單：「熱血公民」創辦人黃洋達大戰匿名者阿Man！（其實係咪都屬於C1？）

對於佔領期間冇咩落旺角或者冇咩睇新聞既讀者來講，未必對阿Man呢個人有太大印象（或者睇咗都唔知啦）。其實佢就係佔旺期間綠絲帶、幫手清road block、跳橋未遂嘅大隻叔叔，「綠色和諧」阿Man。而就係今個月嘅15號，佢以「忠義民團」成員呢個朵參加咗「反熱血反港獨大遊行」，亦向「熱血公民」黃洋達挑機，要求隻揪。同日，黃洋達原本都會出去會下佢地，但係咁啱個日黃生訓醒個遊行就完咗，作罷了。

咁當然，講身份論地位評級數，正常人都唔會應承呢啲不平等條約，睬佢都有味啦。之但係對手係熱血公民黃洋達，而佢諗咩真係好難估，俾佢吹漲。

以正常理解層面來睇，黃生點都冇必要同呢位匿名者阿Man打，簡單點出三點啦：

1. 知名度：黃生有名有姓，贏咗固然好（同廣州獨立一樣，機會唔係冇既……）；而輸咗，俾人狙擊恥笑都事小，最大問題就係俾匿名者阿Man成功上位之餘，壯大埋「忠義民團」，仲等佢哋多個精神領袖為佢哋嘅行為提供「成功反熱血反港獨」嘅正當性，頭香尾彩大擸，公平咩？

2. 鼓吹暴力解決問題：泛民建制藍絲共產黨都會一致口徑話你熱狗鼓吹暴力、提升群眾對肢體沖突的接受程度間接促成革命等等明張目膽嘅子虛烏有；左膠又話你俾藍絲打殘不代表我們、唔對準政權、對時局冇幫助、邊個最開心、然後呢？唉，總之都係一味抽啦。

3. 身型：筆者都見過兩位實物嘅，就咁睇嘅話，身高其實都係差半個頭左右，小問題，黃生憑佢小巧玲瓏嘅身軀都拆到嘅；之但係講到磅數，同問女人幾歲一樣，唔提好過提；目測黃生都係正常身型，大約百三四磅左右，都算有肌肉，加上呢兩個月都有打拳，相信會幫到手嘅；而Man哥，不得了啦，一睇就知係飲木瓜奶大嘅變形俠醫，同黃生比真係分得出係兩類物種來；磅數應該都係差廿令三十磅，希望阿Man輕手啲啦；平時見佢，對胸澎湃到史泰龍咁，佢件招牌白T單吊西都擋唔住，直頭係拍 Second Blood 嘅不二人選，呢啲貨色，隨時硬食一拳嘅話都揼到黃生入廠，呢場真係屬於黃生嘅個人生死決。

咁綜合以上兩點，點解仲要打呢？佢就喺最新一集《笑死朕》為大家提供咗答案，簡單講幾個：

1. 始終香港未盛行呢類活動，藉此宣揚MMA文化。

2. 搞MMA都暴力，咁都係返維園「今天我」啦。

3. 搵錢：係非常正當嗰種，唔係七一拎籌款箱支持世界和平，最後筆錢都唔知去咗邊嗰啲。係要同阿Man簽合約、傾宣傳成本、賽例、場地等等細節嘅一場商業活動。對於「熱狗」呢類成日要幫示威者執手尾嘅團體的確需要咁嘅精打細算。

4. 活動背後嘅「挑戰」意義：身為一個進步嘅政治組織領袖，要能夠充分表現出「雖千萬人吾往矣」嘅勇武，先可以身先士卒俾追隨佢或者追隨佢理念嘅同路人睇，佢唔係流於口舌之爭而係做實事嘅。同時亦不忘改善抗爭思維至更進取嘅模式，將「明知不可為而為之」嘅精髓穿透人心同坦克：連阿Man呢類角色，我黃洋達咁嬌小都夠膽抽，個個都有呢種大偉向巨人挑戰嘅精神，咁抗爭革命獨立建國，日子仲遠嗎？