過去70幾日，數以百計市民浴血喺警渣暴力之下，有女仔被非禮，有記者及醫護人員被毆打，甚至有記者被捕。有啲本來係戰地先會出現嘅情景，喺香港出現咗。付出咁多血汗，絲毫寸進都爭取唔到就要離場，政府嘅大清算行動亦已經展開。

喺呢個本來係反省及檢討嘅時候，大家都表示「我們會回來（We'll be back）」。的確，大家會返嚟──只要有機會，就會返嚟再享受（We'll be back for another enjoyment）。大台上嘅人叫大家享受呢一晚，大家就好似重返大學 O Camp 一樣，有人湊熱鬧，有人拍照留念，有人排長龍拎記念品，有人開大食會，大家爭相「到此一遊」。佔領者、記者、醫護人員及普通市民過去呢段日子所承受嘅傷痛，頓時被拋諸腦外，彷彿話比全世界聽，原來白事喺香港真係可以當紅事嚟搞。

有人話，運動啟蒙左下一代嘅心，係階段性成果，咁講的確有市場。但請問各位，一場足球比賽輸波之後，輸波嘅球員喺球場內搞嘉年華會慶祝，會對年青球迷有乜野啟蒙？

從開始至今就扭盡六壬務求令佔領行動退場嘅民主黨，尋日就喺記者面前排排坐，劉慧卿及久未露面嘅楊森仲露出燦爛嘅笑容。此情此景，令我想起以前學校露營時玩集體活動嘅開心情景。香港人好善忘，一日時間就忘記咗呢班人前日先開記招批評付出血汗嘅前線佔領者，臨清場前同佢哋劃清界線。

二十幾年嚟，港人每次嘅付出，最後都化成某一撮人嘅台板。今次算係稍稍跳出咗二十幾年固有嘅戲台，自己演自己寫嘅劇本，但估唔到最後又係重踏別人嘅戲台。

喺《出埃及記：神王帝國》裡面，當摩西決定要衝過紅海嗰陣，有希伯來人企出嚟投訴摩西，埋怨摩西從奴隸主手中帶佢哋出嚟係累死佢。呢個希伯來人，似十足香港人。如果而家喺法老王時代，我一定全心全意追隨鄙視「和理非非」嘅上帝。起碼上帝唔會白痴到用「道德感召」面對殘暴嘅法老繼承人，做事乾手淨腳，絕不婆媽。