可能你覺得今次衰咗，咪下次再嚟囉。我想問你一句：2007衰咗、2012衰咗，係咪想連2017都想衰埋？曹劌論戰：「一鼓作氣，再而衰，三而竭。」我相信大家都聽過，但點解無人明白呢個道理？唔通你哋覺得一個咁無恥嘅政府，仲會畀一次又一次嘅機會香港人去爭取真正嘅普選？你哋真係咁天真？

輸完一次又一次、輸完一次又一次，去到今日，我哋終於踏出咗邁向民主嘅一小步，但點解你哋剩係識唱歌、高呼和理非非、仲有影相打卡？唔通你哋心目中嘅民主，就係靠呢啲野爭取返嚟？唔好同我講笑啦！

在我而言，最難聽嘅說話唔係咩「香港嘅未來係屬於你哋架」，而係當我見到有人俾人打、俾人踢嘅時候，仲有人喺後面度唱海闊天空，畀埋哂嗰啲所謂鼓勵嘅掌聲啊！我唔想睇住香港人呢七十幾日嘅努力，白白斷送喺你哋呢句「和理非非」嘅手入面啊！

香港人嘅抗爭，從1997年開始，就一直都只係喺維園度坐；去到今時今日，我哋都只係坐出行人路少少咁多咋！你哋唔係覺得咁樣就值得拍手掌慶祝吓話！醒啦你哋！足足訓咗十七年啦！係咪要訓到2046，先至明白咩叫做抗爭啊！抗爭唔係坐喺到唱歌等俾人拉啊！

抗爭係企出來，為我哋覺得啱嘅野去同人鍊過啊！