顧名思義，我係要回應那位等了114個月公屋的廢青。同時想借此以我做銀行平時接觸的人和事，常試去表達一下我對現今樓價高企的見解，主要從就業角度去探討。本人畢業於現時其中一間地鐵，唔好意思，係港鐡沿線上的一間大學。可能我真係唔夠料，或者坊間所講，我的名字，我的姓氏，用英文字顯示時，並唔係國語拼音，名字兩個字唔係連係一齊，所以當時畢業時，高X，摩乜摩物班HR，見到我張resume，應該好似房署職員對廢青張公屋申請表一樣，一早掉咗俾劉江華。所以，有得面試嘅，都係本地嘅銀行，最後入咗其中一間，之後都轉過幾間，一直負責前線嘅工作，其中樓宇按揭都係我嘅範疇。我公司有好多同事，每日都見好多客，放工後，因為應酬，都不停認識新朋友，當中有不少係我哋祖國嘅同胞。我就係想從我工作同應酬嘅地方所接觸到同見到嘅十年變化，去解釋點解啲樓可以升到脫晒節，背離所有收入與供款嘅比率，回報率等基本因素。

入正題，廢青提到，每日有150個單程證，當中並唔包括因有本地公司招聘，攞住香港居民身份証，入嚟打工嗰批人仕。呢班人，對我哋嘅住屋需求，產生咗好大既影響。正如我所講，十年前，好多投行大行，都鍾意請國內人做前線嘅工作，希望可以憑佢哋嘅關係，吸引到大陸嘅富豪高官，打佢哋（財富）嘅主意。無可厚非，喺金融業，一切錢行頭，只好認命。好彩而又有能力嘅本地人，都重可以得到人工相對少啲嘅後勤同lT部門嘅職位。10年過去，好多早就嚟打工嘅國內人，現已成為呢啲大行嘅管理層，最識運用人際關係嘅佢哋，運用佢哋喺公司嘅影響力，安排一啲唔想做sales嘅客戶嘅子女，填滿晒一切已可填入嘅職位，連暑期工都唔放過。暑期工呀，大佬，呢啲職位就好似一間公司入面嘅BB咁，即刻令我諗起我阿哥啱啱出世嘅BB，一出世，就要同人爭奶粉，大個咗，連暑期工都要同人爭。講堅，我寫到呢度，喊咗。而且情況已由投行大行，普及到我身處嘅零售銀行，連萬二三蚊嘅好junior嘅職位，都由好多本地大學畢業嘅國內留學生fill up咗。

咁呢班人到底住咗喺邊？真實個案，我早幾年，就有個國內嚟嘅同事，返咗工一個星期，問我平時做咁多按揭，一定識好多地產經紀，叫我介紹個畀佢。咁我問佢，你諗住搵邊區，佢話都有上網睇過，覺得南區幾好，又係港島區，又冇市區咁密度高。咁我咪介紹個香港仔嘅經紀阿陳仔畀佢。最後佢老豆同老媽子落咗黎陪佢睇樓，陳仔同我講返，佢老豆話，香港仔，嗰度係食海鮮架喎，漁村嚟喎。重話冇返過千尺，同家鄉住開嗰啲差唔多大嘅話，都唔考慮。大家都知，今時今日，有得住海怡半島，外母都唔只請食雞脾啦，嫌三嫌四。最後，佢買咗貝沙灣。陳仔話佢哋睇樓嗰日，係大堂撞見徐子珊喎。斷估佢老豆都唔太知係邊個，聽到個名，以為係徐子淇之類，轉頭就簽成咗。之後成個香港仔XX閣物業代理班經紀，又咭片，又電話咁麻X煩咗我成個月。我簡單計一計，我同事做內部，估佢頂籠3皮野一個月，有可能只得2皮。就用3皮野計，咁供款比率唔係一般人嘅50%，而係5倍，250%，當然如果佢有借錢做按揭嘅話。

應酬篇。話説幾星期前，約咗一個工作上認識，做開金融業marketing嘅女性朋友食飯，話轉咗去一間同金融業無關嘅PR公司度做。當中重有埋佢幾個同事一齊。見到面一開囗，佢就用普通話介紹我畀佢啲同事認識。心諗，乜料呀，強國人？同金融業無關嘅公司嚟喎，都有佢哋足跡。就業染紅，已經去到各行各業。老實講，本人經過114個月喺銀行嘅洗禮之後，絶對可以用流利嘅普通話同佢哋溝通。工作上就話冇計，私人生活，冇需要同佢哋講國語，加上佢哋又扮勁堅持話識聽廣東話，所以我全程講廣東話。話不投機半句多，全餐飯佢有佢哋用國語同我嗰位女性朋友傾計，我有我用廣東話同我嗰位女性朋友傾計。飯後，我嗰位女性朋友話叫我帶佢哋去蘭桂坊見識下。心諗，而家去蘭桂坊你估好似以前咁，畀你開一兩支幾舊水嘅白酒可以跳舞跳成晚。由於租金貴，啲夜場唔再供應白酒，下下都要開香檳，千八蚊支呀大佬，開兩支夠去台灣泰國一轉啦，幾舊水來貨，加兩支好似嘲笑緊你燒銀紙嘅煙花，賣成千八，唔怪得某間用香檳名命名嘅夜場可以上到市。我冇咁儍仔，所以扮攰話唔去，佢哋見冇人領航，都話散band。點知有位姑娘話同我住得好近，我咪一架的士車埋佢返屋企。途中，佢話佢租緊我嗰區一個200尺嘅單位住，月租接近萬五。佢落咗車後我心諗，估佢都係搵皮幾野，減完租金邊有錢使先，點生活呀。唔使講，又係國內嘅父母接濟先搞得掂。呢件事反映到，香港嘅租金唔再同普通打工仔嘅薪金掛鈎。

一個正常嘅社會，樓價應該可以由租金反映，因為要計回報率，物業投資者同用家都會計下租樓同供樓邊樣有著數，喺咁嘅租金水平下，租樓嘅人一定係輸家，但係有班人唔怕輸，因為佢哋輸極都有。物業持有者既然有班長期肯輸嘅人支持佢哋嘅高回報，佢哋點會平賣啲樓畀你。而租金嘅支付力，就係由人工嘅多少反映，正常嚟講，我搵一萬，最多只可以支付六千嘅租金。由於有唔正常嘅人可以搵一萬，租一萬，甚至乎搵一萬，租萬五，啲樓價點會唔升到脫離現實。加上有呢批廉價勞工，就算出呢份糧，你要訓街，但人哋就唔使訓街，你係老細都唔使點加你人工啦，同時令到薪金上升大大追唔上通脹。所以早幾個月啲人咪出晒嚟訓街囉。明未呀？正苦。