細個打開電視，都久唔久會聽到支歌仔：「兩個就夠晒數，兩個已經夠晒數。」當時香港大概正值嬰兒潮，生育率急升，政府鼓勵港人計劃生育。廿年之後，政府有見人口老化，前特首曾蔭權就走出嚟叫港人生三個先夠數。時至今日，因為有調查指香港人出生率下跌，家計會推出新廣告叫人生夠四個！！傻的嗎？

家計會作如此呼籲，主要因為見到「港人生育率下跌」的「現象」，而直接改變此「現象」，就係叫大家生多幾個。講得白少少，就係頭痛醫頭嘅做法，完全漠視引發「現象」嘅「本因」，治標唔治本，難怪宣傳片於大小討論區、媽媽界都引起了激烈討論。

我嘗試從一個很片面的角度去分析，以小弟作為一個初為人父幾年嘅中佬角度去睇一睇。

時下年青人普遍遲婚，如我廿到尾成婚嘅已經叫罕見，身邊不乏三到尾未婚嘅筍盤。唔少都話要趁後生努力搏上位，之後先諗成家立室。然而，在上者七十不退，頂頭仲有一大班六、七十後等緊機會，幾時輪到你？結果結得婚嚟都四十出頭，除非娶個少妻，否則已屬高齡產婦，生一個係好，生兩個已經超額完成。有朋友生完一個都話夠皮，全副心力放晒落去，實在無可厚非。

事實上，住屋問題係最直接降低生育率。香港地生活空間狹小，連人都變得壓抑。本來「性」係排解嘅渠道，然而年青小倆口寄居劏房，行房怕驚動鄰居，懾手懾足，反而更壓抑。有愛無性，如何有愛情結晶？

當你好彩有父幹上到樓結到婚，生仔之後要面對嘅問題都唔少少。香港向來係無掩雞籠，生個仔要撲床位、搶奶粉。之後仲要同雙非爭學位，遲下分分鐘仲有三非加入戰團。一眾相關產業理得你死大賺特賺，湊大小朋友要400萬？邊得呀？

出生率下跌，並非得單一成因嘅社會問題，當中牽涉太多太多。經濟環境，社會風氣，政治穩定性，教育、就業機會，樓價等等。其實以上全部都係基本問題，香港人口爆棚，仲每日有150個單程證擠入嚟，眼見政治環境每況愈下，教育界嚴重赤化，家長們都唔係低能，生兒育女要負好大責任。响佢哋自己都見唔到個社會有希望嘅時候，仲點帶希望俾新生命？