星期一我花咗1個鐘時間，由8點至9點，喺最繁忙嘅大圍站第10卡位置，觀察列車班次，結果見圖，並附相關分析：



1. 沙中線通車後，東鐵會由12卡減到9卡。港鐵聲稱會更新訊號系統，早上繁忙時間由現時約3分鐘1班車，加密到2分鐘多啲，即係由每小時20班車加到27班。如果用車卡計算，而家每小時係240卡（12卡 x 20 班車），將來係243卡（9卡 x 27 班車），剛好抵消減車卡嘅影響。

2. 而MTR Service Update之前話，上述「對外嘅官方數字」係錯嘅，「內部嘅官方數字」其實係：
24（班次）x 12（車卡） = 288（車卡）
32（班次）x 9（車卡） = 288（車卡）
為何有出入？版主無解釋，估計多出來嘅4班車係大埔及火炭開出嘅短途車。Anyway，兩個講法分別不大，都係數字遊戲，總之加班次可以抵消減車卡嘅影響。

3. 根據我嘅觀察（1小時23班車），證明MTR Service Update嘅數字先啱（少咗1班車唔係重點）。

4. 重點來了。沙中線後，東鐵要由而家1小時24班車，加到32班車，足足加8班車，先可以「剛好」抵消減3卡嘅影響，以現時東鐵線嘅繁忙程度，有無可能？

5. 星期一朝（8點至9點）大圍站列車間距平均係56秒（最快係35秒！），上落客時間平均係1分48秒。而更新訊號系統，只能縮短列車間距，唔可以加快上落客時間，呢點大家要記住。

6. 即係話，假設上落客時間不變，增加班次，只能從縮短列車間距入手，而家平均係56秒，仲可以縮到幾短？40秒1班車？定係30秒？ 如果真係平均3、40秒一班車，要everything under control先得，但現實有無呢個可能？

7. 上落客時間是否真的不變？唔好忘記，將來東鐵減3卡，新界東北再發展，人口比而家大幅增長，更多乘客迫入更少車廂，大家想一想，上落客時間會係快咗，定係慢咗？

8. 星期一朝23班車中，只有1班係要關2次門，其餘都係1次搞掂，算係幾暢順。如果將來減3卡令上落客時間耐咗，最有可能係要不斷重新開關車門，就好似繁忙時間嘅金鐘站咁，每重啟一次車門，就無咗10秒，港鐵話，如果荃灣線1小時內重啟車門達12次，就會少咗1班車，流失2500人嘅載客量。港鐵承認：「最高班次數目在技術上已無法達到原先設計的水平。」呢個情況，會唔會發生喺將來嘅東鐵線上？

結論：你仲認為新界東北再發展，只係單單影響一小撮居民嗎？

（圖片來源：Qwer132477 | CC BY-SA 3.0）