黃：烏克蘭是否走向分裂？

沈：基本上已經分裂咗好耐，親歐派及親俄派互相視對方為政治犯，冇和解嘅可能，內政部長頒令拘捕亞努科維奇，佢哋嘅支持者絕對唔會信服。

黃：覺唔覺得係一個顏色革命？

沈：顏色革命係指通過民眾手段去推翻獨裁政權，亞努科維奇之前確實有殺過平民，無論平民有冇武器都好，咁呢個係牽涉到政府集團式鎮壓，係一定需要追究，政權嘅認受性已經受到質疑。咁呢個係唔係親歐派嘅勝利？現階段確實都係嘅，好多證據都顯示到呢個群眾運動，係同歐美領導有聯系。

黃：亞努科維奇係唔係一個極權政府？

沈：當佢個政府用武力鎮壓平民之後，佢就失去咗合法性，群眾運動就得到認受性，但喺鎮壓之前係唔係一個極權呢？呢個又唔一定，就算喺季莫申科管治期間，佢嘅管治都充滿問題，貪污腐敗都有極多污點。其實邊個管治都好，都係嗰個機器，只不過佢今次用咗武力鎮壓，就算佢嘅支持者都冇辦法死撐。

黃：成個運動有一尐極右份子參與，例如新納粹主義正黨，被定性為極右運動，呢類評論點出嚟？

沈：無疑有呢類人存在，但絕對唔係佔領呢次運動嘅主流，佢哋只係參與嘅一份子，無論外間演繹也好，抑或係香港嘅演繹，我相信多多少少都係借題發揮。

黃：其實局勢變化咁急速嘅主要原因喺邊度？

沈：如果佢唔係動武的話，佢唔會失去本身基本盤嘅支持。其實可以鎮住場面，除咗政府之外就係財閥，出動到暴力鎮壓，財閥就會驚，如果被清算嘅時候，連自己有嘅都冇埋，咁就唔敢再撐呢個政府。除咗富商之外，國際壓力都好重要，雖然歐盟唔會有軍事干預，但佢哋之前都做過好多姿態，包括制裁，都會對政府構成壓力。仲有最後嘅一點，其實烏克蘭政府自己犯咗好多錯誤，先至去到呢個地步，因為前後有好多機會解決到危機，但一直唔願意作出重大讓步，好難避免有咁嘅下場。

黃：往後季莫申科仲發唔發揮到影響力？

沈：其實佢都係一個好爭議性人物，佢都有好多FANS，但又唔算係國內最受歡迎人物，都有唔少人批評佢離地，在任期間亦有唔少擬似貪污痕跡，再者佢發跡亦都只係靠私有化，並唔係十分光彩。其實佢本身係唔係選總統，仲要睇番國際社會點睇佢，雖然佢係得到西方支持，但都勉強得到俄羅斯接受，往後要視乎佢現時走嘅路線係走中間，定係完全倒向反對派。

黃：如果季莫申科依家仲展示局部傾向俄羅斯，會唔會即刻失去反對派支持？

沈：佢要食住群眾運動嘅聲勢，就一定要話烏克蘭盡快入歐盟，不過如果佢繼續走呢條路線，咁就一定得唔到東部嘅支持，咁佢究竟係走中間路線，抑或想喺短時間之內奪權，咁就得佢自己先諗到。季莫申科講嘢開始反覆，最初一出監就話要選，之後又話唔一定，似乎佢都要觀望一輪。會唔會係變咗東部分裂呢？如果季莫申科覺得係可以接受的話，咁佢咪全面親西方囉，如果佢想維持表面嘅統一，佢就應該要走番中間。

黃：你覺得烏克蘭全面內戰嘅可能性高唔高？

根據外電睇嚟，有一尐群眾係有武器，亦都有少量民兵，但似乎都唔係主流。佢哋嘅底線都係唔想打仗，不過形勢可以變得好快，關鍵係有冇一個地方敢宣佈獨立，例如克里米亞呢個俄羅斯裔為主嘅半島，如果中央政府係傾向反俄的話，咁佢哋會唔會可以宣佈獨立呢？咁當地領導係咁有講過獨立嘅可能性，如果類似事情真係會出現，咁就未必唔可能出現內戰，但現階段就未有囉。