(圖片來源：Psycho Hawks)
作為旅居海外香港人，睇到香港局勢係過去兩個星期嘅變化，係極之擔心。不過擔心還擔心，我想係分析現時形勢前，先講一尐理論。
唔知大家有無聽過Stanford Prison Experiment？無嘅話，你可以去Wikipedia睇吓。簡單講，喺1971年美國Stanford University有位心理學教授設計咗一個實驗，就係將參加實驗嘅志願人士分成兩組，一組做囚犯，一組做獄卒。在實驗進行期間，「囚犯」及「獄卒」漸漸投入角色：「獄卒」開始濫權虐待「囚犯」，部分「囚犯」逆來順受，覺得被虐待係理所當然；雖然有部份「囚犯」覺得不應被虐待而作出反抗，不過「獄卒」成功威脅覺得被虐待係理所當然嘅「囚犯」協助佢哋，阻止其他覺得不應被虐待嘅「囚犯」作出反抗。實驗最後因為有違反研究道德而腰斬，不過就帶出一個叫做The Lucifer Effect嘅結論。簡單講，就係當人喺某啲環境下，會覺得自己做嘅事係絕對正確，然後就開始濫權去對付啲佢認為係錯嘅一方；即使佢用嘅方法係唔合理或者唔人道，佢都會覺得因為係申張正義，即使用唔合理或者唔人道嘅方法去懲罰對方，都係正義嘅。
今時今日嘅香港，就係好似Stanford University位教授個實驗場地；直接尐講，今日嘅香港就係中國用嚟囚禁啲無力反抗嘅香港人嘅「監獄」，而今日嘅香港政府同埋班賣港財閥就係班開始濫權虐待「囚犯」嘅「獄卒」，而當本土派人士好似班覺得不應被虐待而作出反抗嘅「囚犯」，開始出聲提出要本土優先，要保護香港人嘅應得嘅福利，就有一大班左膠、離地中產、以及泛民好似班覺得被虐待係理所當然嘅「囚犯」一樣，協助「獄卒」阻止其他「囚犯」作出反抗。而且佢哋會理直氣壯話：作為「囚犯」，我哋係應該逆來順受！
或者您會問我，點解尐「獄卒」同埋覺得要逆來順受嘅「囚犯」會咁冇良知？其實，佢哋都或多或少係個實驗嘅受害者。當「獄卒」濫權去虐待「囚犯」，佢哋唔覺得自己有錯，反而佢覺得「囚犯」有錯在先，要虐待「囚犯」去令佢哋改過自新；而逆來順受嘅「囚犯」亦覺得自己有錯在先，應受懲罰。
歸根究底，到底香港實驗室入面嘅「囚犯」犯咗乜嘢原罪，要被「獄卒」迫害？其實就係一切似有若無嘅中國優惠（例如CEPA，同埋自由行等等）以及喺大中華膠協助下僭建給港人嘅中國人身份。就係呢一切來自中國嘅「優惠」，給予「獄卒」喺佢哋嘅內心世界，建構了「囚犯」犯了無對中國主子知恩圖報嘅原罪；而逆來順受嘅「囚犯」亦有相同嘅內心世界，不同嘅係逆來順受嘅「囚犯」係站喺無權無勢嘅一方，只能沉淪做「囚犯」，並阻止其他「囚犯」反抗「獄卒」。
當有人問我，點先可以叫醒沉睡嘅香港人去保護自己，我會話：佢地唔係瞓咗，佢哋係醒嘅，不過佢哋覺得自己應該被剝削、被虐待。香港同烏克蘭唔同嘅地方，係香港人一直無自己嘅identity，由於無identity，先會人云亦云，無晒分析能力，所以香港一直出唔到優質嘅本土主義，亦未能好似台灣當年咁，有班人願意為台灣獨立去寫理論，同埋投身會有生命危險嘅台獨活動。
今日香港政府同中國喉舌已經統一口徑，將上星期嘅合法同和平嘅示威者，抹黑做破壞社會安寧嘅生事者，更高調話要拉要鎖。我會話：我同情佢哋（中國喉舌除外），因為佢地喺The Lucifer Effect嘅受害者。不過如果佢哋真係咁做，香港將會瀰漫白色恐怖，樂觀啲睇，或者會令更多人去問：我哋不應被虐待，我哋要反抗。
最後，我想向正在烏克蘭抗爭中嘅人送上我嘅祝福：You are not alone。我亦希望盡快見到香港有人能夠寫出優質嘅本土主義嘅理論，為香港走上完全自治奠定理論基礎！