差不多由廿年前起，就負起單獨照顧女兒嘅責任，女兒自小被訓練出有獨立思考，行動派，願意擔當，見義勇為嘅人。知道自己需要嘅就努力去得到，達成理想，如攞獎學金去加拿大讀課程，攞獎學金入讀理工大學，隻身遠赴馬爾代夫帶人潛水兼考取教練牌等等（數之不盡），呢一切我都引以為傲。

今日，我女兒也站到最前線，為的是自由，為的是「我是Hongkonger」。

上星期六同佢一齊收工，食完午飯佢就同埋乖未來女婿執好所需裝備，去到金鐘支援，留守到天光，戰友手足輪流回家休息。當時佢話：「我驚㗎，半夜有咩聲響就立即作好準備，預咗最壞打算喇。」休息過後，又再執好行裝出發支援戰友手足。

以上一切一切，我都做妥心理準備，就如佢隻身去教潛水無危險嗎，人和地都係陌生的。明知689政府會鎮壓市民，我撐佢哋，佢哋係為咗自己以後嘅人生。

有幾多人可以得到我女兒咁豐富、咁精彩嘅人生，佢有機會做到咁多想做嘅事，都係自己爭取返嚟嘅，完完全全無辜負過自己個人生。

我以你為傲啊囡囡，Emma Kong！

你呢？朋友們，你哋又為自己爭取過啲咩啊！無悔人生嗎？？就喺今日站出唻啦！

香港需要你地啊 Hongkonger ！！

（作者為一熱血公民成員母親）