我屋企樓下有間麥當當，由屋企行到落間麥當當只需數秒，尋日我又不由自主咁入去買野食。

我見到有新產品叫「新地蘋果脆」，10蚊。我心諗，新地6蚊，蘋果批5蚊，就算佢真係咁冇人性咁畀返兩樣一模一樣嘅野我，都有著數，於是我就叫咗個外賣。原先都以為佢會稍為有啲 packaging ，執返好個外型先比我，真係估佢唔到，佢真係就咁畀一個蘋果批同一個新地我。我真係好想大聲嗌回水，大叫唐唐個句「你呃人，你講大話」，啲士多啤梨果肉係 唔係俾麥當勞叔叔食咗，新地雪糕得3個圓周，少過兩蚊新地筒。

將兩樣野擺埋一齊就係一個新產品……

我望住呢個「蘋果批同新地雪糕雙併」，我心諗，將杯可樂同雞翼分開畀我，係唔係新產品「可樂雞翼」。開包茄汁，放包薯條入去 shake ，係唔係茄汁味 shake shake 薯條呀咁。

其實咁多年，我都覺得麥當當真係好有創意架……

• 我仲好記得「點 jack」遊戲，嗰個「點 jack」好似碎屍案咁俾人斬開四碌，只要你集齊四件身體部份，你就可以365日，日日食麥樂雞。當時我有個 auntie 中咗，送咗數十張畀我用，我而家諗返起食嗰啲係過期肉，真係覺得自己嗰段日子，同日日喺停屍間咬腐屍係冇分別。
• 我又好記得麥當當一次推出18件麥樂雞，我真係好震撼，我真係好鐘意食麥樂雞。我冇諗到麥當當竟然由零售麥樂雞，變咗批發麥樂雞，一打打咁賣。
• 早幾個星期，我去佐敦間麥當當，見到啲位一格格咁，我望住食緊野嗰啲人，真係覺得佢哋好似家禽，農場啲牛隻咪每隻牛有一格伸個頭出來食野嘅，真係咁迫你都諗得出，真係好想讚佢叻仔。

曾幾何時，我覺得麥當當係「秒秒鐘歡聚歡笑」的地方，個開心樂園餐外賣盒我都玩到一日。我都曾經相信麥當勞叔叔係個好人，我阿媽炸野都要蒸一蒸，無你我真係品嚐唔到炸野。但點解你賣過期肉衰咗，守行為呢段期間都 hea 做，唔改過自新。今次個新地蘋果脆真係令我對麥當當徹底死心。

P.S. 話分兩頭，有一樣新產品，我真係好想麥當當推出，我真係好想喺個熱香餅上面加個新地雪糕，但新地雪糕要11點之後先賣，熱香餅又11點前賣，佢兩個真係「只差一點點先可以再會面」，如果真係出，我唔洗星期日去 café 排 pancake 雪糕，如果加3蚊可以擠個新地喺我個熱香餅度，我食返麥當當啦。

（本文原載於作者面書專頁）