我覺得呢間旺角咖哩屋，簡直是大家的潘朵拉盒子，覺得好好奇，但又唔敢打開，怕打開之後唔知會標啲乜嘢出來。

以前行過旺角行人專用區，每次都要打醒十二分精神，因為呢個位成日都有個印度人響度埋伏，趁你唔為意，就會拎住支咖哩屋嘅旗撲出來大叫嚇鳩你。



響高登，見到有幾篇食評都話旺角咖哩屋好難食，又講到啲揸旗嘅印度人好搞笑，如果你問佢路，佢會同你講旺角咖哩屋好撚難食，咪撚去。毒撚媒體嘅總編羅生話，有一次行埋去問印度人間餐廳收幾點，印度人答佢：「我11點收工。」

既然咁有趣，我今次唔孤獨，響facebook組咗一隊劣食團，一於去試吓佢到底係龍定鳳！

4月29日晚上7:30，我哋一行五人響旺角集合，第一步係去試吓問印度人路，睇吓佢係唔係叫我哋唔好去食！

我好撚尷尬咁行埋去問佢：「咖哩屋響邊咖哥哥？」原本以為佢會好冷淡，點知佢勁開心，主動帶我哋路。



入到去，我哋五個人叫咗一個四人餐，但已經包括一碟炸魚，一碟炸雞，五盆咖哩，兩碟飯，一兜餅，飲品係Mango Lassi（有啲似芒果乳酪，好甜，糖尿病勿試）！只係600幾蚊，算係幾抵食。



等咗唔係好耐，嘢食已經送到，雖然同啲侍應溝通唔到，但好在佢哋有一個講廣東話嘅阿姐，乜都可以問佢。之但係，食咗一啖炸魚之後，我知道今次瀨嘢，因為一啲都唔難食，外脆內嫩！

雖然唔可以話非常之好味，但印度菜嚟講係及格的，我哋五個人，係咁食係咁食，完全冇停過手！我唔想形容佢有幾好味，因為我唔想寫普通食評，我嘅目標係寫劣評。

總之今次，係完完全全地失敗！亦令我發現咗一件事，劣食一定要自己一個孤獨咁食先至夠劣。可能一班人柴娃娃，嗰種歡樂嘅氣氛，係會令到食物變得好味。咁嘅態度，你一世都食唔到世界上最難食嘅野！sosad

日期：2015年4月29日
時間：7:45pm
地址：旺角通菜街57號
價錢：$614/5人