1,415億貴唔貴？你問吓發展商就知，佢哋買地起樓，大啲嘅 project 都以百億計，以會德豐為例，剩係計佢將軍澳嘅投資都有成308-318億，但係又點解唔會有人話貴？發展商口裡說不，但身體很誠實，次次投地投標都有支持，個個都𦧲飯應，點解？因為佢哋一定回到本。而家起機場跑道喎，1,415億，好似好撚貴，但係喺合符經濟效益咁回到本，又唔怕起。所以，當大家都講緊1,415億可以做啲咩嘅時候，不如以商業角度計下個機場要幾多年先回到本。

以我公司為例，基本上一個 project 要上馬，最多五年內就要回本。由2009年起，機場收入每年大約增加10%，2013/14年度收益除稅後大約65億，按呢個增長率同收入計，2023年大約有250億收益（除稅後），就咁計好似好OK，五年就回到本。但大家諗深一層，其實收入增加主要係來自零售特許經營權同廣告（佔總收入40%），呢個項目嘅收入平均每年有大概20%增長。眾所週知，20%增長係一個好難一直維持嘅數值。如果呢個數字一減，例如減到得返10%，咁個總收入增長亦會大減至6%。以呢個增長率計，2023年收入會減到得返130億，回本期大概就要11年（仲未計通脹）。講真，一個11年先回到本嘅 project，你睇下邊個發展商騷你，你老味，點上馬？

政府估計嘅數字大部份以2030年嘅 result 為主：客運量會達至1億，貨運量9百萬噸，客運量多3千萬，創造出141,000個就業機會。但我最唔明嘅係，我哋地呢家兩個 terminal，兩條跑道請咗7萬人，為6千幾萬嘅人流服務。咁即係，多一條跑道多一個 terminal 為多3千萬人服務，就要請多咗一個 double 嘅人。在商言商，佢個成本效益真係好有問題。請多一倍嘅人手去服務只係增加咗比原本數目多一半嘅客量……呢啲咁嘅 planning，同任何老細講，佢都會啪啪聲屌柒你。

其實，有個好好嘅解決方法，就係將機管局集資搞上市，叫哂啲商家佬投資。機管局而家由政府全資擁有，將集資啲錢攞嚟起第三條跑道咯。好似地鐵咁，市場主導，起碼大家唔使估估下，佢成條數俾哂啲 banker 搞，又睇下到時有冇人幫佢唱，有冇人抽IPO（Initial Public Offerings 首次公開募股）？再唔係就叫發展商投標，睇下個 project 會唔會得到李嘉誠、四叔、大劉等嘅祝福。至少，搞上市投標一定有好多律師會計同基金佬睇住，佢哋無得一句「中央已開綠燈」，就收哂你班友皮。

貴並唔係1,415億最大嘅問題，而係……

成件事其實真係好撚詭異，又唔使立法會撥款，兩個前民航處處長又極力反對，個 project 又無成本效益，個環評又唔撚知係堅定流。唔知點解，總係有種被人老強硬上既感覺……所謂「中央開綠燈」，嗯，李組長眉頭一皺，發現案情並不單純……

（本文原載於本土文集）