台灣大學生為了反對立院黑箱審議「兩岸服務貿易協議」，昨晚闖入立法院進行佔領，獲得一眾香港的激進派人士拍手叫好，但中文大學社會學系副教授、佔中三子之一陳健民今日傍晚接受網台 D100 節目《風波裏的自由 Phone》時竟然邀功，指有人說台灣群眾舉動是受到香港的「和平佔中」啟發，更滿口歪理，認為佔領中環，比起佔領議會更加激進。

陳健民認為台灣大學生佔領議會的行動，其實是參照了香港的「佔領中環」，指兩者有好多相似之處：「會場裡面都貼出一啲守則，同『和平佔中』好相似，佢哋都係強調和平非暴力，唔可以隨便破壞公物，亦都要接受統一指揮，要有紀律等等，同我哋嘅諗法其實好相似。有啲人甚至話佢哋其實喺呢啲佔領行動裡面，係受到香港『和平佔中』嘅刺激。」

另一方面，陳健民亦多次強調公民抗命的重點是要和平，認為台灣大學生亦都堅守相同原則：「公民抗命一方面係和平，另一方面唔代表係軟弱，即係話唔需要充分合作，所以有啲人亦都叫做不合作運動，所以佢哋只係要堅持唔用暴力。但我睇呢班大學生，我覺得佢哋都係秉持呢種精神。」

陳健民亦相信，民主化後的台灣，再不會接受過激的抗爭行為：「民主化咗之後嘅台灣，你再用返以前好悲情嘅方式，譬如用肢體抗爭咁呢，未必一定攞到社會嘅支持。至於公民抗命嘅方式，我之前都去過台灣，同一班年青人同 NGO 分享我哋運動嘅理念，反而對佢哋嚟講有啲意思，雖然佢哋已經係民主化之後嘅台灣，但係佢哋覺得好多嘢個政府都好閉塞，好唔透明，佢哋要抗爭的話，都唔想走番之前嗰條舊路，佢哋覺得公民抗命都係一種值得參考嘅方式。」

當主持問及台灣大學生以阻止議會運作，去阻止惡法的時候，對香港有沒有啟示時，陳健民竟認為佔領議會不夠佔領中環激進：「有啲人覺得佔領中環，比起領佔議會更加激進，有尐人覺得冤有頭，債有主，你咪去搞個政府囉，唔好嚟搞中環。對於有一大堆人嚟講，佔領中環其實係更大嘅挑戰，產生嘅干預同爭議就更加犀利。」不過陳健民就相信，沒有民主的香港，他日抗爭情況會比起現時的台灣更激：「繼續咁落去，香港嘅情況會仲壞過台灣，台灣起碼都有個民主體制，點都有個遊戲規則，大家點樣唔服氣都好，都可以選你落嚟，喺香港，如果連呢個遊戲規則都冇，即係民主都冇，大家嘅衝突同激化會更加犀利。」