今日係8月29日，距離開學日只係得返兩日，你做晒功課未？

無論升小一定中一，每年嘅呢一日，我都悔不當初，因為通常我呢個時候都係咩功課都冇做過。本來買晒姣婆公仔月曆，寫晒「每日功課幾分鐘，返學之前好輕鬆」嘅人生目標全部都冇實踐。

其實每年暑假鬼節，見到阿媽燒衣，都好想隊埋本暑期作業落去燒。

_________________________________

到咗呢個關鍵嘅時刻：

• 我都會數幾次，「1月大，2月小，3月大，4月小，5月大，6月小，7月大，8月大……」，因為我要確保8月唔係得30日，make sure 我仲有兩日做功課。
• 唔理三七二十一，唔理啱定唔啱，我都會痴咗線咁將所有暑期作業嘅空隙都填滿佢。排句呀，擴張句子個啲，我全部都變咗縮短句子。選擇題就要毫不經意，無規律的 ABCD 晒佢。
• 好似立法會拉布咁，我日以繼夜，夜以繼夜咁做功課。一邊做一邊諗：出得嚟行，預咗要還……
• 我仲會不停同天父講數：「天父呀，如果今年俾我過到呢關，做晒啲功課，我下年真係會改過自新架天父。」
• 做做下，阿媽一定恐嚇我：「抵你死啦，你做唔完我實唔俾你睇兒歌金曲頒獎典禮。」我係唔可以唔睇架，我個個年代無 MyTV 架，我唔睇，開學我點同同學仔討論賽果咟。聽到阿媽恐嚇我，我就會好似鬼上身咁口噏噏同天父講：「天父呀，唔好意思呀，頭先漏咗，千祈要俾我喺兒歌金曲頒獎典禮前 hur hur 聲做完呀，我真係會痛改前非架我。」
• 最慘都莫過於做完一頁，揭去下一頁係叫你剪報搜集資料，臨時臨急叫人點搜，真係好想打999。

如果係都要喺暑期加上一個期限，我希望係一萬年……

總係有幾年，9月1日係星期日，然後我又係會8月30日先做功課，然後再不停揭日曆 confirm 9月1日係星期日。

痴咗線咁趕緊功課嘅朋友仔，加油啦。

P.S. 暑假過咗之後，年尾 peak season 之前，我阿姐觀音上身，慈悲為懷的俾我放 annual leave，都係個句，「如果係都要喺張假紙度加上一個期限，我希望係一萬年…」。Holiday，我真係「愛你一萬年，愛妳經得起考驗，飛越了時間的局限」……

（本文原載於作者面書專頁）

（圖片來源：Henry Lan via Flickr）