在加拿大很多家庭裝食材，份量很多，不過如果家中只得兩口子，食唔晒就會浪費，為咗慳錢，都會動腦筋去處理食材，今次買了一盒11件雞上脾，示範了兩款食物也存下11條骨，遲下用來煲湯，所以想同大家分享。
食材處理：雞上脾肉
雞上脾肉在外國好多時都是煎香加香料與湯／酒燉煮或用來焗煮，其實可以起骨做雞扒，比起用雞胸肉做雞扒肉質更滑，11件雞，用了4塊煎雞扒，4塊包好入冰格收藏，3塊雞扒去了皮可以切絲／切粒／切塊用來炒菜，骨留起用來煮湯物盡其用。
煎雞扒早餐材料：
雞扒4塊／洋蔥半個（切絲）／皇子菇1盒（切條）／沙律菜適量
醃料：鹽／白胡椒粉／雞粉適量
調味：鹽／黑椒／酒適量
做法：
（1）雞扒用淡鹽水浸一陣再清洗，用廚房紙索乾水份，以鹽／白胡椒粉／雞粉醃過夜入雪櫃
（2）煎之前半小時從雪櫃攞出雞扒，加些少鹽在雞皮上，也可以加一些黑椒粉
（3）用平底鑊（我用炭鋼鑊），想不用黐底，一定要熱好鑊，直至洒水在鑊上水成為水珠四散遊走，就即是夠熱，落油和將雞扒皮朝下煎
（4）想雞扒煎的皮脆肉嫩，可以用一塊錫紙舖在雞扒上，再用另一個平底鑊壓在上，煎2-3分鐘至金黃色，拿開錫紙和平底鑊，將雞扒反轉煎（不用再舖錫紙），煎至熟即可
（5）雞扒上碟後，倒去多餘的油份，落洋蔥炒至半透明，落皇子菇，拌勻炒香，灒酒，落鹽和黑椒調味，炒至香軟即可上碟
（6）雞扒配上洋蔥皇子菇再加上沙律菜即成一個好味又營養豐富的早餐
時菜炒雞球材料：
雞脾肉3塊切塊（大粒/球）／芥蘭苗／薑片和乾蔥切絲
醃料：豉油／生粉／糖適量
調味：豉油／蠔油／糖／酒／水適量
做法：
（1）雞扒用淡鹽水浸一陣再清洗，用廚房紙索乾水份，去皮切成塊以豉油／生粉／糖醃過夜入雪櫃
（2）煎之前半小時從雪櫃攞出雞肉，落少少油鬆開雞肉
（3）用易潔鑊落油加薑片爆香，下芥蘭苗炒一陣，落少少鹽炒至半熟撈起備用
（4）用一隻鑊，落油，爆薑片和乾蔥，下雞肉，平均散開雞肉在鑊上，煎至一面金黃，反轉，炒香，灒酒，加入調味汁料，煮幾分鐘，芥蘭苗回鑊，炒至雞肉和芥蘭苗都熟而且汁也收即可上碟（也可以下生粉水收汁）
廚房筆記：
＊ 調味是可以隨意加減，大家自行斟酌
＊ 雞上脾肉在醃之前不要用水清洗
＊ 炒雞球因為醃時下了生粉，所以沒有再用生粉水收汁
＊ 存在冰格的雞扒（可以存放1-4星期），解凍後可以浸一浸淡鹽水，可以去雪味
＊ 在外國醃雞我會加雞粉，因為這裡的雞冇乜味道，所以加少少雞粉提鮮，如可以買到好好味的雞扒，可以不用加