前晚上網，見到啲人紛紛討論政府最新嘅廣告宣傳片，於是好奇搵嚟睇吓。一睇之下，嗰條得十幾秒嘅宣傳片，首先播出市民遊行、推鐵馬、集會嘅片段，最後黑底白字寫住兼讀出：「有票 真係唔要？」
我睇完好嬲，而且即刻浮起疑問：貿貿然將咁具爭議性嘅議題，整個寥寥十零秒嘅廣告交待成件事，重要喺電視台黃金時間播放，究竟係咪恰當嘅做法呢？
有疑慮，梗係先問 Google 大神。翻查政府以往嘅宣傳片，有叫人唔好八號風球去觀浪呀、拖欠薪金屬違法呀、推行長者醫療券呀之類，主要都係圍繞公民教育、現行法律同埋已經落實嘅政策三項主要範疇。而呢幾類主題，都可謂黑白分明，無乜爭議。但係今次呢段「有票」宣傳片，真係睇到人火都嚟！
首先，候選人到底點樣產生，係2017特首普選率先要解決嘅問題。有市民對呢方面有意見，甚或反對政府提出嘅方案，於是上街遊行集會表達訴求。而條片入面嘅第二個鏡頭，已經清楚見到有人手持寫住「普選工程」嘅橫額。但政府而家嘅手法，就係將普選簡化為僅止於「全民有票投」，候選人嘅產生方式就搏大霧隻字不提，平時就吹風話乜鬼「佔中犯法」「法治不容挑戰」，跟住就整條片扮晒無辜咁話：「政府都講咗畀你哋2017投票選特首啦，你哋仲嘈？一個二個搞搞震，家陣係咪唔想有票投先？」
喂喂咪住先，《基本法》白紙黑字寫明市民有集會、遊行、示威嘅自由㗎 [1]！ 市民參加遊行集會表達自己訴求，係無犯法喎！政府而家就有理無理，硬係將和平集會嘅市民都塞埋入去條片度，咁算係咩態度？梁振英用所謂「個人身份」簽名反佔中就得 [2]，市民行使正當權利就被打成破壞和諧擾亂秩序呀？只許州官放火，不許百姓點燈！
第二，條片更加造成分化市民嘅效果。廣告不但止故意忽略片中市民嘅真正訴求，亦撇清政府一意孤行嘅後果，顛黑倒白，暗示集會市民係今日社會亂局嘅罪魁禍首，塑造佢哋「厚多士」嘅惡劣形象：「你班刁民有票你投都仲唔知足？」結果將普選引起紛爭，推卸晒落遊行集會嘅市民身上，並一律被冤枉為「阻住人2017投票」嘅千古罪人。
政府指住呢啲對普選有訴求嘅市民，對住「沈默的大多數」市民講：「嗱，就係呢咋人呀，搞搞震呀，阻住你哋2017投票選特首呀！」政府嘅宣傳告白刻意誤導「沉默的」市民，令佢哋以為呢群示威者係「有票，真係唔要。我哋唔要投票選特首」。一個政府，竟然拍條片出嚟撕裂社會，造成市民之間互相厭惡，真係惡毒到令人難以置信，唔講真係以為返咗去大陸「反右」嗰陣咁，指住你鼻哥就話你「非我族類」。
但係嬲還嬲，我哋可以點做呢？有無諗過向廣管局投訴？原來陳淑莊喺2010年已經就政府喺2012年政制方案宣傳（包括電視廣告）質詢過林瑞麟 [3]，佢嘅答案一言以蔽之：「推廣政府政策」唔算政治廣告，所以唔會觸犯《廣播條例》。但係那邊廂，2010年劉慧卿喺商台話要爭雙普選，呼籲人去大遊行，商台就被廣管局裁定播政治廣告，罰咗幾萬蚊 [4]。嗱，劉慧卿講普選、遊行就唔得，政府「有票」宣傳片，同樣講普選、遊行，得唔得？到時政府一定話，政府講普選、遊行就係「推廣政府政策」；劉慧卿講普選、遊行就係「政治廣告」，你話我話啦。
呢件事，我真係好嬲。政府用宣傳片嚟喺黃金時段發放政治訊息，根本係屈機嘅。你唔鍾意劉慧卿，你可以唔投票畀佢，你可以唔捐錢畀佢（黎生會唔會捐就另一回事），就算佢喺商台賣多一百八十個政治廣告，起碼你無份協助佢賣廣告嘅，起碼都無咁嬲吖。之但係家陣政府整條「有票 真係唔要？」宣傳片，製作費你同我都有份畀㗎！事關條片係用公帑製作㗎（即使外判都係啦），就算你無交稅你老闆都有份交㗎，唔係咩？香港市民被迫夾錢俾佢整條咁嘅垃圾片，將普選爭議卸責畀市民，即係畀錢佢整條片鬧我哋呀，你條氣順唔順？我情願政府用嗰啲錢嚟整多兩條禁毒宣傳片囉！
最後，要提醒一下大家，根據呢個政府「循序漸進」嘅習慣，電視台播出「梁特首帶領市民進入香港新紀元」、「非法集會挑戰法治，切勿以身試法」之類政府廣告，建制借「推廣政策」乘機自我宣傳、污衊政敵嘅日子，指日可待。
（作者補充：今日搭港鐵時驚見多個呢款燈箱廣告，政府唔使畀錢電視台播政府宣傳片，但用港鐵燈箱要畀錢啦啩？！香港市民嘅又一筆血汗錢，花咗喺呢啲燈箱度！政府就是次題目嘅宣傳，可謂前所未見之舖天蓋地！）
[1] 《基本法》第二十七條：香港居民享有言論、新聞、出版的自由，結社、集會、遊行、示威的自由，組織和參加工會、罷工的權利和自由。
[2] 梁振英簽名反佔中惹爭議
[4] 《十八仝人》「卿姐聲帶」廣管局裁定違規播政治廣告「罪成」商台罰款