文章開始前，我先表明自己立場：我係一個 KillerSoap 嘅 Fans；我唔覺得梁逸峰同學嘅朗誦技巧有任何問題！我只係一個玩過十幾年音樂，就連八級都無嘅鼓佬。但我認為欣賞音樂，係唔需要執著於對原曲嘅解讀，更唔需要解讀成社會現象。

好多夾 Band 嘅朋友都會改編其他名曲，不論作為練習編曲或個人喜好都好，可以話係 Band 友嘅日常，因為每個人對每件事都有唔同體會，每個人解讀歌詞內容都可以唔同。你俾女神呃咗，可以呼天搶地，可以好冷靜，可以有報復心態，我就唔敢胡亂猜測陳樂基（Rocky）將《月半小夜曲》唱成一個咁 Rock 嘅版本用意何在，為比賽又好，表現自己技巧又好，但我作為一個 Band 友我覺得呢個版本好正，我覺得咁唱表現到嗰種歇斯底里嘅感覺。

「但我的心每分每刻　仍然被她佔有

她似這月兒　仍然是不開口」

呢個位「爆」有咩問題？失戀唔開心「鳩叫」有錯？咁演繹我覺得十分到位。「我仲好掛住佢，但佢唔 Show 我，我可以點呀？」我唔敢講好多人都好似我咁諗，但我係咁覺得。

「我的牽掛　我的渴望　直至以後」

由放輕把聲唱，到推返上去「爆」多次，表現出嗰種無奈，覺得自己解脫唔到嗰種痛，要用「叫」去釋放；之後繼續「爆」多次 Pre-chorus，將自己所有嘅失望同絕望，留到最後段 Chrous 昇 Key 一次過「爆」出嚟，我想問咁樣解釋 Rocky 嘅演繹，有咩問題？

我覺得，如果你經歷過一段令你刻骨銘心嘅愛情，你聽一次 Rocky 嘅《月半小夜曲》，你應該會有一定嘅共鳴。如果你係因為歌詞內容同歌者演繹方式唔夾而去批判佢殺死隻歌，咁我提議你去聽下 Vocaloid 嘅《Just Be Friends》同睇下佢嘅歌詞，你一定會覺得作曲嗰條友一定係痴撚線。再講，又用「XXX殺死了YYYY」嘅 Topic 真係好悶……不過依啲都係原作者嘅主觀，所以我不作評論；但喺你眼中，「唱歌」和「音樂」，竟然係一件如此規限嘅事？

我從來唔敢用資格論去批評任何人，因為每一個人都有自由去批評其他人。但我最討厭就係好多人用自己把口去抹殺他人嘅努力同夢想，用「左膠」嚟比喻追求夢想嘅人，直頭就係屈辱我哋啲夾 Band 嘅人！「左膠」之膠，係無實際效用又消耗大眾嘅力量，最後畀自己掌聲自我感覺良好覺得自己做咗嘢。我哋夾 Band 追求夢想影響咗你哋啲咩先？我哋有無要求要大家畀掌聲我地，等大家覺得我哋做到嘢先？的確係有人覺得自己懷才不遇，但我相信大部份夾 Band 嘅都有一條「傲骨」，唔會要啲「不義嘅掌聲」。

每隻歌好聽唔好聽，全部係個人感覺，結果如何都唔會影響到其他人；但喺街大小二便，呢個係公民意識同法律問題，的的確確係會影響到大眾！唔係佢哋覺得 ok 就 ok 嘅問題！呢家無人話隻歌唔好聽要講到好好聽，大家都係發表自己嘅聽後感，用呢個比喻大家對底線嘅堅持？係唔係反大陸反到痴撚咗線？唔係隨便拎樣「大家都討厭」嘅嘢嚟比喻就等於無問題。

本文中咁多「我覺得」，其實係想講「音樂或者藝術，本來就係一件咁主觀嘅事！」你唔鐘意聽「鳩叫」，你可以聽返其他，但講到要用歌嘅本身去考慮埋改編嘅內容，就會太受規限，埋沒創作。同埋唔好再將追求夢想嘅人同「左膠」或者「隨地大小便」混為一談！呢個比喻真係難聽過比人話：「你哋夾 Band 夾得好撚難聽！」／「你畫嘅畫好撚難睇！」

延伸閱讀：
【鹵味男：陳樂基殺死了《月半小夜曲》】
http://www.passiontimes.hk/article/08-05-2014/18209

【荒野狼：陳樂基事件與泛民左膠思維遺毒】
http://www.passiontimes.hk/article/08-06-2014/18221