註：真人真事，如有雷同，家門不幸。

Facebook friend list 之中有個舊同事，佢住喺我隔離楝大廈。同佢好少見面，但我都幾瞭解佢生活，因為佢平均每日會 post 十幾廿條 status 上 facebook，當中超過一半係有胸。

我都知正常人都有胸，著泳衣、cosplay、著晚裝……等等好多情況都會露胸，但佢勁在著咩衫對波都會走出嚟同你 say hi，即係著街坊裝落街食碗魚蛋粉都要自拍都算，點可能可以一手拎機另一隻手拎住枝膠匙舉隻V手出嚟用陰力喞到隻波上頸（冇錯係隻唔係對）？

有時用手勢或者道具夾唔起對波，佢就會用姿勢搭夠。嗰啲臨瞓福利圖，唔知點解臨瞓都化行哂妝假眼睫毛，加埋著住 lace 睡衣嘅佢一打側訓就自然會「北漏動奶」，當然做戲做全套，要加多句：「各位早抖，我一個人刀可以訓得好。」

屌你訓啦柒頭！用遙控影成百九幾張相，揀完重要執相，之後又要落妝同換返衫先有得訓，唔好唔記得第二朝又要早成個鐘起身，做返場招魂法事叫返啲五官歸位，先可以影返張：「morning 啊各位，一起身唔願落床牙。」

雖然我心底係咁笑佢，但其實我成日 like 佢啲相同留言鼓勵佢：「嘩件衫好靚啊！」 「你個妝好 pro 啊！」 「你好似又瘦咗啊~」 之類，佢又會好有耐性覆我嘅留言。佢人品唔差，亦唔係嗰種拜金港女格，可能只係想有多啲人關注佢。睇佢 facebook 個 friend list，真係乖乖不得了，有成二千幾個 follower，分分鐘多過啲奀星！

有晚佢 whatsapp 我，問我可唔可以落樓下茶餐廳同佢吹下水。落到去見到佢坐埋喺角落神情呆滯，佢話俾條仔飛咗。我心諗：屌俾仔飛咋嘛！你一年都轉幾個男朋友架啦。但我都有做吓樣安慰吓佢，順便等佢講啲唔開心嘢出嚟等我開心吓。

佢話同個男仔識咗成年先一齊，就係半個月前佢同個ex分手先乘虛而入，點知一齊冇耐就話分手。我問多兩問，原來所謂相識咗一年係指 facebook 上 follow 咗佢一年，之後見佢同男友分手就 pm 佢話暗戀佢好耐，第二日約出嚟見面就一齊。

我好理性咁同佢講，唔啱都冇辦法啦，你又靚女又多人追，咪再搵過個囉。點知佢即刻喊到豬西咁樣，佢話呢段感情好 hurt，好想死！我問佢係咪借咗錢定拍咗你片啊？半個月可以有幾咁蕩氣迴蟲呢？點知佢話，佢接受唔到個男仔分手嘅理由：

「你真人個胸比起網上睇細好多。係細好多，唔係少少。」

我即場啟動震機模式忍笑，你老味嗰條友仔都幾仆街，作個藉口都懶，可以想像嗰份圖片與實物不符嘅哀怨有幾深。佢問我，點解啲男人咁仆街，個個都係貪佢身材同上床，次次拍拖都拍唔耐，點樣先可以揾到一個好男人。

我都唔知講乜好，本來想講啲大道理又覺得㗰氣，唯有叫佢自己睇返 facebook 嘅相，大部份都係影住個胸，其餘都係食嘢、k-pop，咁你覺得個男仔瞭解你啲咩優點呢？讚你識食呀？讚你聽畸 pop 有品味呀？不如你試吓講吓其他嘢，等人哋瞭解你身材以外嘅嘢啦。

佢聽完我鬧佢幾句，覺得我鬧得佢好啱。點知當晚半夜我打開電腦，又見到佢著件小背心夾胸！但加多咗一句：「內在美比外在美重要，希望會遇到一位懂得欣賞我內在美的人。」

……咁即係點啊？你估啲人有X光眼呀？望住你個胸可以睇穿你嘅內在美？

老老實實佢只係自貶身價，任何人都有一個價，唔係價錢，而係價值。明明塑造到自己係性感女神，食隻燒鵝脾都要搔首弄姿，搞到留言一地精，男人剩係想同你上床好正常吧？點知見到實物先知係 PS 大師，身材同個樣唔係嗰回事都算啦，但已經俾人感覺你個人唔老實。再發展落去上埋床，你根本唔係佢幻想中嘅風情萬種小野貓，只係一個好普通嘅女仔，連唯一可取嘅地方都冇埋，咁對方貪你乜？貪你 PS 得叻跟你學嘢？

我即刻 whatsapp 佢話，喂你咁樣真係唔掂喎，頭先先話想搵個好男人認認真真咁拍拖。不如你開個新 account，唔好再貼埋啲對波圖，認認真真做返自己啦。

點知佢第二朝覆返我： 「開個新 account 就好難再咁多人 follow 架啦！」

（完）

（圖片與本文無關，來源：wallpaperpig.com）