喺旅程開始之前，我要講一件事先。其實我真係對食物環境好低要求，基本上入到口我都ok，亦唔係一個偏食嘅人。所以，如果連我都話難食，間餐廳好應該執笠！

今日中午有4粒鐘休息時間，所以我一個人浩浩蕩蕩殺落已經響apm開咗一段日子嘅熊本熊cafe，試吓佢哋啲熊本直運食材係咪咁好味。



到達時間，係下午1:30，啱啱中午OL團散哂，我可以好輕鬆入去鳩坐邊個位都得！但係去呢啲 cafe，一個人真係好唔自在，旁邊嗰幾枱都係情侶，得我一個係寂寞的心夜夜叫咁。不過好在，有個貌似出爐影帝劉青雲嘅男仔搭我訕，仲坐埋我對面。



咁食得主題Cafe，我對食物係冇期待的，但求唔好好似上次Hello Kitty中菜軒咁一pat嘢就好。

第一樣嗌嘅，係 set lunch 大蝦天婦羅咖哩 ＋ 蘋果汁，咖哩飯本身都好難煮得難食，算中規中矩，除咗條天婦羅幼過手指尾呢個問題之外，都好正常。



但我最驚喜嘅係，佢哋啲餐具真係好舊好可憐，裝蘋果汁嗰隻熊杯上面隻熊本熊傷痕累累，好似黑社會大佬咁周身疤痕....



另外點嗰個杏仁蛋糕配雪糕仲慘烈，隻碟上面嘅熊本熊公仔居然係貼紙！！！！！
隻碟上面嘅熊本熊公仔居然係貼紙！！！！！
隻碟上面嘅熊本熊公仔居然係貼紙！！！！！（因為很重要所以要講三次）
仲要已經就甩就甩！！！咩料呀？



雖然cafe入面公仔都算多，黑色又襟污糟，但佢地千算萬算，冇估到D咕𠱸會甩色lol ，講真，我唔敢攬囉！佢令我好有悲傷嘅感覺呀！係咪想串我青春不再？！



不過總括嚟講，食物都落得吓肚嘅，set lunch再另加甜品埋單$184.8，值唔值見人見智，反正你都唔係為咗食飯咖啦！



日期：2015年4月21日
時間：1：30pm
地址：觀塘apm LG一田超市
價錢：$184.8