食色性也，對性嘅渴求唔需要人教，每個人都會有。細個好奇總會睇報紙風月版，再大個啲就識上去某個網站睇片，性係每個後生仔都一定會努力去自我學習嘅一課。到你開始拍拖，某日送女朋友到佢屋企樓下，臨走佢同你講今個星期六屋企冇人，不如上去佢度？你吞一吞口水，做個OK手勢，心入面仲開心過中六合彩，你終於可以正式脫離青頭仔嘅行列。係開心嘅同時，你突然間諗起你之前睇過一個廣告：保護自己，要有一套。你走到去便利店，望住收銀下面嘅陳列架，心思思唔知揀邊隻好，又怕畀人望到你買，結果行嚟行去成五、六分鐘，等間舖冇乜人，你先敢拎起幾包薯片放喺收銀前面，再即刻拎起杜記是但一盒扔係幾包薯片下面，買完嘢連收銀都唔敢望就咁行咗出去。到星期六，你去到女朋友度，纏綿一番後準備入戲肉，就喺你哋肉帛相見準備探險嘅時候，你女朋友唔畀你入，然後問你買咗安全套未？喺果一刻，你突然唔想拎出嚟。男人有時就係咁犯賤，做之前乜都得，到埋牙嗰下始終都係想打真軍。但係你女朋友堅持要有套先肯做，你唯有死死地氣咁拎出黎。到底安全套，用定係唔用？

安全套又叫保險套，顧名思義係為咗令大家可以有安全性行為同更加保險，唔洗出現爸爸唔好唔要我嘅結局。而家嘅安全套除咗講求基本功能，仲有好多增添情趣嘅設計，好似係凸點同熱感。生產商用盡方法去提升你哋喺魚水之歡嗰陣嘅投入感同快感，強調用咗就好似冇用一樣。但無論點講都好，你嘅分身套住咗一層膠就係套住咗，點都呃唔到自己冇用到，呢一點亦都係好多男性唔肯用嘅原因，唔可以直接同你嘅伴侶有最親密嘅接觸，好似唔係真真正正咁佔有佢哋咁。但你要記住扑野係生物學角度係叫做交配，射精唔係純粹得嗰陣嘅快感，而係為咗生育下一代。仲讀緊書嘅你，係咪咁快就準備好為人類嘅繁殖出一分力？

我唔講你有冇錢先，好多學生哥識個女朋友都係靠睇樣，覺得佢靚就追，而學生妹見你樣唔差又成日陪佢傾電話粥，得閒請佢食飯睇戲通常就乜都應承你，做男朋友又好，想食禁果都好，但你準備好應付搞大咗人個肚之後上佢屋企認係經手人未？你準備好未了解乜嘢係愛情嘅你，咁快就要照顧個女仔未？而個女仔又準備好大住個肚咁返學，受盡人冷眼，甚至被迫退學做全職師奶未呢？唔好以為射喺出面就得，喺做嘅過程當中你分身分泌出嘅前列線液係含有精子嘅，而要搞大你女朋友個肚的話，唔洗多，一粒就夠。所以身為學生嘅你，帶住個套可能冇無套個感覺咁舒服真實，但身為青頭仔或者冇乜經驗嘅你，有得搞已經係一種福氣，淨係聽條女嘅呻吟聲同叫你大力啲，都已經足夠彌補返個安全套帶走嘅嗰小小快感，到最後射落個套，你攬住女朋友嘅胴體大汗疊細汗咁，咪一樣已經係大個仔囉。

到你再大啲，識得落蘭桂坊玩識得落吧蒲，又可能有機會喺嗰度識到一啲周圍等仔溝嘅女人。你見到個啱心水嘅，埋去同佢打個招呼傾下傾，佢又肯理你，大家有傾有講飲多兩杯落肚。依個時候個女人瞓落你度，同你講依度好嘈，你即刻識做咁帶住佢離開間吧，順手同你朋友講聲拜拜，然後直接返你屋企或者去附近嘅時鐘酒店。五年前你嘅初戀同初夜你就話想佔有佢唔想用套啫，到咗今晚你唔應該會再有唔用套嘅念頭。畢竟面前依位靚女，你除咗知佢叫 Candy 同佢電話號碼之外就一無所知，佢同咩人搞過？條友有冇性病你都唔知。連前戲你都唔敢用口，佢想用嘴幫你舒服舒服你都要帶咗個套先。你雖然醉，雖然好希望解決生理需要，但都好清楚有啲嘢真係搏唔過。衰啲講句，一夜夫妻嘅佢有冇中招你可能唔太關心，你更加驚嘅係唔用套激戰一晚之後，從此椰菜花梅毒甚至愛滋病就會跟住你。帶返個套，你可以盡情玩唔同花式去滿足你自己，甚至喺臨射果陣拎出嚟除套射到佢成身都係。你好滿足咁望住你自己嘅戰績，望住佢上氣唔接下氣個樣，然後就沖個涼準備瞓或者回氣之後嚟多一次，到第二朝著番件衫再出門口，同佢講聲拜拜。可能你地已經約左幾時再出嚟「聚一聚」，或者今次就係你哋最後一次見面，但最起碼你知道嗰晚係舒服、難忘、仲有安全。

人鍾意由性當中得到快感，但好多人都因為一時快感而乜都唔諗，最後後悔莫及。我唔係話每次做都一定要帶套，但唔帶套嘅對像只應該係你老婆或者你肯定佢之後會係你老婆嘅女朋友。當然，如果你係嗰種牡丹花下死，做鬼也風流嘅大情聖，覺得寧願要愛滋都要無套獵食的話，咁我只可能係度同你講一聲：祝你好運。