已經係時候，揭竿起義！

04年兩大名嘴大班毓民封咪，十年後歷史重演！
香港主流媒體被統戰，明報變梁粉報，蘋果被抽廣告，所有TV變晒CC。

咁點搞呀？又出唻話最黑暗一日，又悼念又拉黑布咁呀？
唻緊梗係又集會，飯民又要立法會動議要商台交代咁樣。我唔反對呢尐行動，但你哋想商台或者明報交代尐咩？你想佢兜口兜面話你知：「我係共產黨喉舌」，然後你得個知字呀？

唔好再向已經全面赤化嘅主流媒體乞討，而家要做嘅係開戰！全面杯葛赤化舊媒體，全力支持新媒體運動吧！

家下新媒體，已經多如雨後春筍，你慌冇選擇？

有人會認為，新媒體影響力，仍不及舊媒體。舉個例：引用大班係D100節目所講資料，D100整個台嘅聽眾群，已經高達40多萬(計算unique IP)。截至2014年1月，「熱血時報」嘅聽眾群，計算unique IP亦已高達40萬。
因為熱血時報與D100某些立場相左，亦曾經罵戰，兩台聽眾相信重複度不高，就算當佢有一半重複，兩個台加起來的聽眾，粗略計點都高達60萬，再加上黃毓民坐鎮嘅My radio(未公佈收聽數字)，單是現時的網台收聽，絕對足以抗衡舊媒體！

再加上網上新聞媒體，如「主場新聞」、「852post」、「獨立媒體」、「社會紀錄頻道」等等，影響力方面，絕對足以對抗舊媒體。

氣候已成，現在已是開戰時刻，那麼，除了拉BANNER搞悼念，可以做什麼？

1,全面杯葛赤化舊媒體：
罷聽商台，罷睇明報，不要再幫襯所有已經赤化的媒體。
有尐人話：「我早就冇聽啦！」咁係唔夠架，要勸你地身邊所有人，唔好再睇再聽再買，向身邊所有親朋戚友，推介新媒體。

2,以牙還牙，斷佢米路
689向廣告商施壓，迫商家抽廣告。我地要以牙還牙，搵晒所有商台、CCTVB、CCATV、梁粉報河蟹報嘅廣告客戶，搵晒出唻，一人一信去畀壓力佢地，話佢地係極權幫兇，等佢地害怕自己商譽受損，勸佢地抽廣告。再進一步，就係罷賣罷幫襯。要斷舊媒體米路。
（呢度有中英文信範本：http://www.passiontimes.hk/article/02-13-2014/8654）

3,鼓勵更多新媒體
奉勸所有媒體從業員，唔好再向你老細乞討交代，向佢乞討自由。先唔講網絡媒體，就算係印刷媒體，你哋有心出唻獨立搞，點會搞唔到？我用20萬做本都可以搞到《熱血時報》成為最大網台之一，每月出版報紙。以明報記者為例，以你地之專業，眾志成城，點會搞唔起？「獨眼香江」離開信報，自己搞「852post」咪一樣有聲有色！再唔係，好似陳曉蕾咁獨立採訪，一樣可以殺出一條路來。

4,全民支持新媒體
作為巿民，除咗杯葛舊媒體，斷舊媒體米路，仲要做嘅就係全力支持新媒體。
大力推廣，向所有親朋推介。
仲有，唻緊梗會有尐乜春撐言論自由集會㗎，到時嗰尐捐款箱，全部都無視之，捐錢畀佢地搞集會冇用嘅，要畀錢支持，就支持新媒體運動嘅最前線！
你問我，我就梗係勸你去「熱血時報」訂報紙！仲有就撐毓民，捐款支持「MyRadio」！
但就當你唔LIKE我地，你咪做「D100」自己友囉。
你撐泛民嗰尐嘅，你咪捐款撐「852post」同「主場新聞」囉。
你撐左膠嘅，你咪捐畀「獨媒」囉。
仲有「輔仁」、「惟工新聞」、「USP社媒」、「社會紀錄頻道（SocRec）」、「香港天樂媒體」、「民間電台」。
咩光譜都有齊，實有得你揀㗎！

咪再悼念啦！開戰吧！全民支持新媒體！
咪再講乜最黑暗嘅一日！黑暗咗好耐啦！而家係時候要爭取光明！
咪再講乜傳媒已死！尐屍水都流乾晒啦！而家係要為新一代加油！
咪再迫自己揀爛蘋果，自己種蘋果吧！

愈要我收聲，我愈要更大聲！全民參與香港新媒體運動！