話說筆者同屋企人一齊去北區嘅上水探親戚。一講到上水，相信「水貨客問題」、「大陸化」等等詞彙必然立刻出現喺大家嘅腦海入面。小弟屋企距離北區甚遠，返學、返工、約人等等，都唔會去到嗰邊。簡單嚟講，小弟可以話係十年都唔去北區一次嘅人。

一落車走圍行去搵目的地，上水俾我嘅第一個感覺係「非常陌生」，第二個感覺係「唔似係香港」，第三個感覺就係「住呢度嘅人一定係日日都病！」。當然，我都知道不論係大街小巷，抑或大小商場，都出現好多藥房同化妝品店，主要對象係大陸人。而上水點解變成咁，就係因為呢個港共政府同佢嘅抓牙放縱水貨賊！

本來周街都係藥房、化妝品店，都可以算，偏偏喺上水嘅街頭或者商場，你每行五步就會見到兩三個大陸人踎喺地下，霸住晒條行人路，打開晒個行李喺度塞水貨入去，我甚至見到有職員同個大陸人一齊踎喺度幫手執野，見到咁嘅狀況真係情何以堪！

呢個時候，就係我老豆出場。事先聲明，我唔清楚我老豆嘅政治立場，我只知道佢係好憎689、支持佔領行動，同埋係強烈反對港獨。對於小弟支持港獨，佢係表示「極度遺憾」同「唔知我入咗大學學過啲乜，點解可以有咁嘅諗法」。另外，基本上佢嘅工作同收入係同自由行消費、購物係冇關係。

老豆︰「呢啲（指住踎喺度嘅大陸人）係咪就係嗰啲所謂嘅水貨客喇？」

我︰「係呀，我當佢地係水貨賊。」

老豆︰「點解你要話佢地係賊？」

我︰「吓？唔係咩？佢地恃住自己有錢就喺度搶掠我地嘅資源，唔係賊咩？」

老豆︰「點解你諗野可以咁偏激？咁你點樣定義賊先？」

我︰「你要我定義咩係賊係冇意思架喎，我只係根據一個客觀嘅事實做出一個主觀嘅判斷，佢地嘅行為令我覺得佢地係賊。」

老豆︰「你呢啲叫做主觀？而家佢地做過啲咩先？」

我︰「佢地咪就係落嚟香港走水貨、走私漏稅、不斷掃貨推高日常用品嘅價格、又搞到啲租金貴咗……」

老豆︰「你點可以咁樣話人！？呢個係自由市場，人地要買啲咩你做咩要阻止人？就算啲野貴咗都唔關啲內地人事架，係啲舖頭唔啱之嘛。你做咩要話啲內地人係賊！？」

我︰「啊，咁如果你覺得佢地咁做係冇問題嘅，咪 okay 囉，咁我覺得佢地好有問題，我覺得佢地係賊，呢個係我嘅睇法，做咩要搞到好似我要認同你嗰套先啱？係咪要感謝佢地落嚟消費、振興經濟？唔駛講佢地對經濟造成嘅破壞架喇！」

老豆︰「好喇，咁如果調番轉，你俾人話係港燦，你又會點？」

我︰「吓，冇問題架喎！隨便！如果我周街屙屎屙尿、周圍大聲喧嘩、隨地吐痰，你咪叫我『港燦』囉。」

老豆︰「唉，你咁樣諗你冇辦法出嚟社會做野。好喇，如果第日做野，你老闆係內地人，你唔通又唔做喇喎？如果你有同事係內地人，你唔通又話唔要同佢合作呀？你咁偏激你一定冇可能出嚟社會做野。」

我︰「吓，我有咁講過咩？如果我上司係大陸人，或者我同事係大陸人，我覺得冇咩問題架喎。但如果佢地冇啦啦走去走水貨嘅話，我就會指住佢地嚟鬧囉。」

老豆︰「你咁樣諗一定唔可以住上水。」

我︰「係呀，我都覺得自己唔適合住呢度架。」

老豆︰「即係如果你係住呢度嘅話，一係就你打人，一係就你俾人打囉！」

我︰「梗係啦！」

老豆︰「你睇下你幾偏激！」

我︰「吓？我話我梗係會俾人打，就係偏激？」

老豆︰「係呀，就係因為你偏激所以先會俾人打。」

我︰「嘩，我俾人打，都係我嘅問題，咁得啦。」

老豆︰「……」

唉，其實香港呢個地方真係好可悲，有一班渴望追求民主、自由、獨立嘅人，但同時又有一班人明明俾人蝦緊都仲要覺得冇乜野，仲要喺追求自由嘅道路上拖後腿、批評幫緊大眾爭取權益嘅義士。

當然，對於香港獨立建國嘅追求，小弟係沒有灰心，因為我知道，當革命爆發嘅時候，嗰班明明俾人蝦緊都仲要覺得冇乜野嘅人，係唔會出聲，唔會走出嚟阻止，因為佢地只會喺屋企對住個電視機講︰「唉，呢班人又出嚟攪攪陣！」到革命成功之後，佢地咪又係一樣咁樣過生活！只係唔再生活喺港共極權統治下，而係喺一個自由、開放嘅香港，但一樣隨遇而安！