「我而家就打你！」

夜場內，半帶醉意的坤哥正向門生過料。

「大佬，眾目睽睽咁打盲毛，實有人睇到㗎喎！」初拜門的阿輝認真地聽著大佬的教導。

坤哥聽罷，口中爆了一個單字粗口，一掌拍向阿輝的額頭。

「話你甜筒真係無叫錯！多人睇即係多人知，出嚟行，個朵要夠響夠揚架嘛！私私縮縮，不如去做文雀（扒手）！」坤哥繼續他的大佬風範。

「唔係喎大佬，如果有圍觀者出手，發揮佢哋嘅力量，咁咪瀨嘢？」甜筒輝繼續追問。其他老資歷的門生發出陣陣不屑的冷笑。

「@#¥₩！」坤哥爆出了四個大字。「叫得圍觀嘅，即係唔會出手啦！你驚條毛咩！」坤哥繼續，「人性就係咁，見有人俾人打，本能反應就會彈開，你會唔會無啦啦嗱屎上身吖！」

阿輝若有所思。

「嗱！只要你夠狠夠狼，就算親生仔俾人打，做老豆老母嘅都只係企埋一邊鳩叫架咋！呢啲就係非洲草原嗰啲素食動物唯一嘅求生本能……」眼見大佬講嘢越來越無厘頭，眾門齊聲大叫「大佬好嘢！大佬真係博學多才！」，好等坤哥沉醉於讚賞之中，自動收聲。

_____________________________________

「認住我，我叫甜筒輝呀！」

大排檔內，阿輝把仇家打得半死，所有食客視線都放在阿輝身上。短短半年間，阿輝這個朵已經響偏江湖，靠的，就是支配別人的恐懼。

「望咩呀！邊個再望我連佢都打埋！」話音未落，所有人都垂下頭扮無事。因為阿輝全身上下，都散發著令人感到窒息的恐懼感。

過去半年，阿輝知道一個事實，黑社會的力量，並非來自誰的拳頭夠硬，而是來自人類的心理弱點，只要令對方萌生恐懼，根本就不需忌憚對方會反抗。

（圖片來源：Amnesty International）