「我想到拉薩傳福音，因為在那佛教的國度最需要的就是基督的福音。」那是廿年前小指最大的夢想，在西藏當一個傳道人。

不過時間永遠係最好的見證，廿年後我在西藏，但我沒有做到傳道人。係小指唔再相信耶和華嗎？未必。只係小指用咗十年去明白，只要人擁有無辦法監管的權力就會腐化。宗教如是，社會如是…

一宗佛門中人假結婚案衍生出貪污、假結婚及歛財等各種不堪，好多人震驚何以佛門中人清修戒律會做出如此不堪之事。會有呢種天真想法，我只會笑你太傻、太天真，因為宗教原來就係世界上最賺錢的「職業」，係天文數字面前，如果無良好的制度，邊個可以站得住腳？

可能你會反辯呢個係個別事案，不過事實呢？事實係假結婚中牽涉到唔止一間寺廟。而假結婚一案中兩個男事主居然可以由襟兄弟變成佛門中的師兄弟。如果你同我講香港最大名的寺廟無牽涉其中，咁我真係無野好講。

仲需要更多例子？可以，就用中土最大名的寺廟少林寺做例證好了。只要大家有關心新聞應該都會知道早排少林寺主持都俾佢自家弟子係大陸實名舉報其「官商勾結」貪財，甚至有大量證據證明佢有唔止一個情人，真正中港融合，佛門一家貪。

其實唔止佛教，之前亦有報導香港浸信會計畫用上十億計金錢去起一個佔地25萬平方呎的新教堂。當然呢單新聞暫時並無牽涉到貪污或私相授受，不過同樣曾經引起全城譁然，因為十億計金錢可以幫到幾多人？而係土地嚴重不足的香港，25萬平方呎可以起幾多楝公屋俾人上樓呢？基督教嘅本義到底係建立係教堂身上還是教徒心上？我舉呢個例子不過係想同所有香港人講，其實迷信嘅金錢唔難賺，只要大眾認為花出去嘅錢係支持正確嘅事，而宗教係最容易將一切合理化。

只要一個光環。教會借助耶穌基督可以有光環，寺廟供奉釋迦牟尼頭上都有光環，咁係咪只有宗教至可以有光環專利呢？

當然唔係。

「建設民主中國，平反六四！」每年6月維園燭光滿滿，那些不是光環是甚麼？

曾經我都支持建設民主中國，平反六四，支持民主黨、支聯會…轉眼三十年，佢地到底做過甚麼？每年鏗鏘集係64前後都會有做關於64特輯，由學運領袖點去逃亡到佢地變成人球，有家歸不得，到14年終於講到佢地下一代。原來，好多學運領袖嘅下一代係大陸一樣受到壓迫，於是乎海外華人都會籌錢設法令民運人士嘅下一代可以離開中國，展開新生。

等等！海外華人籌錢去幫手？支聯會唔係自誇全球最大支援愛國民主運動聯合會嗎？佢地每年64係香港或海外都籌到過百萬計善款，點解咁直接去幫助民運人士家庭嘅行動要由海外華人另外籌錢？原來最簡單不過，因為差唔多係同時間，支聯會同民主黨認為開一個64紀念館會比救援民運人士嘅下一代更有意義。如果唔係呢個原因，我真係解釋唔到。

咁支聯會中嘅泛民又對香港嘅民主進程做過咩呢？

2010年政改方案、民主黨出賣香港人支持功能組別千秋萬載、2014年職工盟李卓仁等泛民議員被揭發收取毒蘋捐款，同年雨傘革命李卓人其下郭紹傑帶領佔中紏察篤魁出賣抗爭者，而所有泛民連同佔中三子雙學拖垮雨傘革命，導致香港民主進程三十年寸步不前甚麼倒退！！

我好奇怪！當宗教上嘅光環被揭破，香港人點解會咁譁然。其實係政治上，香港嘅所謂泛民，佢地嘅光環已經破產！由桃色紏紛、變節、出賣甚麼篤魁同路人，佢地嘅醜行唔通唔大過一間寺廟嘅主持犯法？佢地對香港嘅荼毒影響唔係應該更大咩？？

今日，選舉嘅日子重臨，年底區議會到下年嘅立法會，我希望大家可以再重新審視自己應有嘅權利同責任，或者你會覺得議會制度已全面崩壞，議會抗爭都再無意義。呢點我唔否定。不過，我更希望大家可以諗得更深入少少，至少我地可以用我地手上嘅一票去制裁曾經出賣我地嘅騙子，可以用我地嘅一票去減低佢地對世界嘅遺禍。

今年熱血公民有6個成員會參選區議會。坦白講，佢地6個中間小指認識嘅唔超過一半，不過我好相信呢個係最好嘅時候俾大家破舊立新去打破迷信封制，因為熱血公民嘅成立並唔係要偶像祟拜，並唔係因為光頭佬黃洋達，而係我地都有獨立思考能力及同一信念：「熱血、本土、反共」「成功之前絕不放棄理想」

所以，參選人當中雖然大多數並無所謂政治光環，甚至中間有好多受到現實嘅壓迫，但係我地係唔會放棄去做我地認為係啱嘅事。

希望大家係嚟緊嘅日子，可以放低世界一切光環，好理性同憑良心去做自己最後嘅決定！

其實「做人最緊要正直！」