9月28日我提早收工，約下午5點幾到達金鐘，剛站穩陣腳，突然就見到人群中升起一陣白煙，政府竟然出動催淚彈！疏散時收到媽媽的電話，叮囑我千萬要小心。

翌日，媽媽再來電，說現在很危險，不要再去集會示威，我安撫她人多就安全，不用怕。之後她告訴我，有朋友發了撐警察的短訊給她，但短訊太長了，她沒有心機看，也不想看。我說：「send畀我做咩？我自己有睇新聞，自己識判斷，唔使佢哋指指點點！邊個啱邊個錯我自己唔識分咩？」

原本我以為是她勸我，現在反而是我聽她傾訴，媽媽說：「其實我明你哋點解要去，有得出聲就好出聲喇。以前喺鄉下文化大革命，個地主仔成日畀其他小朋友打，打到攰佢哋先停，畀人打都冇得出聲，真係好陰功，個小朋友無罪㗎。而家唔出聲，我怕你哋第日冇得出聲，你哋啲仔女都冇得出聲。唉，總之小心啲啦！」

所以，今天我企出嚟，影響我最深嘅，其實係媽媽。當年她不滿大陸嘅生活，膽粗粗游水嚟香港。我在家排行第三，如果媽媽冇嚟香港，我甚至不知我有沒有出世嘅一日。大陸親戚今時今日做生意做到風生水起，個個有間幾千呎嘅大屋，幾十萬嘅外國入口私家車，但媽媽從沒半句怨言，因為她說：「我咁多個仔女冇一個要畀錢疏通先搵到份工」。我常常說，我媽媽一生人做得最啱嘅決定，就係冒生命危險游水落香港。

媽媽年紀大了，上不了前線，但她默默嘅支持，卻是我最大嘅動力，我會用佢遺傳畀我嘅抗爭基因堅持下去！