話說南宋末年，北面的蒙古國要「統戰」漢人，已經對宋朝重鎮襄陽城虎視眈眈了十六年。為了「溶合」所有漢人，圍城十六年嘅蒙古人同襄陽百姓講，話應承三年後有得選個漢人做太守，叫做「漢人提名」。但其實近兩年，現任太守「陸八久」已經極之親蒙（連街邊小孩都識唱童謠話：佢呃人，係內奸，太守其實有蒙古血統）。短短兩年陸太守同佢黨羽慢慢拆毀了外城的四個護城牆（它們分別叫「自由」、「廉潔」、「法治」和「司法獨立」）。襄陽又俾邊關每日放一百五十個蒙古人入城。

舊年一月，襄陽有個書生叫戴耀廷大學士，話俾百姓聽佢喺自己後園地下搵到「神鵰大俠」楊過口嗰把「玄鐵劍」。佢同蒙古使節講呢件係「神兵」，如果忽必烈唔俾大宋百姓選返漢人做太守就會「拔劍」，把神劍一拔，可以癱瘓襄陽手工業、農業、紡織業，癱瘓南宋經濟。當時南宋係世界上 GDP 最大嘅國家。蒙古人走私咗好多資源去襄陽，如果經濟癱瘓的話，連大汗一家都會損失慘重。戴耀廷以「宋人抗命的最大殺傷力武器」為題投稿《宋報》話遊行絕食效用成疑，可能要準備「殺傷力」更大的武器，就是「玄鐵劍」。玄鐵劍又名玄鐵重劍，是金庸小說《神鵰俠侶》中的一件「神兵」。戴大學士有兩個師兄弟，三人合稱「襄陽三子」。「襄陽三子」提出「玄鐵劍」是最後手段，只要蒙古政府拿出誠意，拿出真正「漢人提名」方案，可以避免玄鐵劍「出鞘」。

宋人百姓話：「蒙古人兇狠好戰，宋朝為禮儀之邦，我哋冇兵唔夠打㗎！」。所以朝廷大黨派（叫做「范文」）話一定要所謂「和平、講理、不武力、不説穢話」。「襄陽三子」答：「咁到時就『讓愛與和平使出玄鐵劍』啦！」佢哋一齊做咗幾個「拔劍演習」，嘗試點樣可以唔暴力咁舞劍。又揾幾個知名學者名人，組織了「拔劍十死士」。

面對蒙古國圍城步步進逼，「三子」同一眾讀書人及老百姓搞咗個叫「D Day」嘅活動「商討」何謂「漢人提名」，又搞個叫「真漢聯」商討甚麼情況先可以「亮劍」。其實玄鐵劍已鑄好，大家以為蒙古人一講冇「漢人提名」應該「拔劍」。點知戴耀廷又話有個新科技叫「信鴿公投」，再投票界定一下咩蒙古方䅁先可以選到「純種漢人做太守」先。搞完一輪，有七十萬老百姓做完「信鴿公投」，「三子」話：「我哋都係唔拔劍住。」坊間人人都知，每年七月初一襄陽有百姓勇武活動。喺襄陽舞劍，呢一日事半功倍。點知「三子」仲話未係時候，先俾「草堂」學子們攞把「假神兵」做個「預演拔劍」先。結果學子們俾親蒙太守「陸八久」嘅衙門官兵拘捕。戴大學士本尊冇出現，反而佢哋玩咗兩個活動，叫「毅行爭普選」同「登高爭普選」。「三子」籌了不少經費，但話行動真正目的係要向蒙古人同忽必烈表達決心。

「陸太守」向忽必烈呈上選下任太守方䅁，已經否決確保百姓可以選擇投票俾漢人。百姓同村民都不耐煩。「三子」又話：「大宋個個斯文人，都係等蒙古人正式提出用蒙古人做太守先拔劍啦！況且蒙古人住喺漢人隔離，或者太多通婚，都係睇下佢哋點界定『漢人』，會唔會咁狼『篩走純種漢人』先啦！」冇幾耐，親蒙嘅組織「幫宋出聲」頭領「呂文煥」發起「保篩選、反拔劍大聯盟」，話搵到成百萬百姓「畫押」支持，又搞一個「反拔劍大遊行」，搵幾萬個蒙古人、金人、大理人、高麗人加入撐場扮漢人遊行。「三子」拔劍陣形氣勢繼續下降。

最後都一如所料，忽必烈俾襄陽百姓選自己太守，但一定要蒙古揀過先得（即係只可以揀向蒙古投咗降嘅漢奸）。「范文」黨話：「呢個係南宋皇朝最黑暗的一天！」。「三子」又改口：「我哋拔劍行動失敗咗，冇辦法令蒙古人開恩俾襄陽揀唔賣國嘅漢人。不過其實我哋把玄鐵劍其實唔係『神兵』，唔係用嚟『講數』用㗎。把劍係用嚟叫醒啲漢人，等蒙古人了解我哋想純種漢人做太守嘅決心！」三子搞新活動「打鑼打鼓唔拔劍」去「啟動就嚟拔劍」嘅儀式。又喊又叫之後話：「到咗嗰一日、嗰一日、到咗嗰一日、嗰一日（唔知講咗幾多次）……嗰一日，我哋做咩呀？我哋……我哋要……拔玄鐵劍！」又散會。

幾日之後又有新搞作，今次係「剃頭決志，出家爭普選」，以示「放棄頭髮、重拾尊嚴」。（忽必烈聽到之後，笑到爭啲駕崩！）襄陽百姓民智未開，竟有多人表示：「三子為國為民，又行山又喊晒又剃頭，你哋盡晒力，我哋好鬼感動！」其他人就覺得「唔係路」，有義軍出嚟鬧蒙古使節俾自己衙門打、俾人鎖冇人理。大家只知道有「拔劍」運動。但運動越做越縮，不斷重新解釋行動目的同時間表……

襄陽城結局係點？當然冇運行。百姓日日睇住學士們「表示選漢人嘅決心」，冇時間諗下點反抗內奸同城外蒙古軍。少數有良知嘅百姓又被衙門拘捕。襄陽城破後，蒙古軍揮兵東征宋朝最後淨土「臨安」，一定要「收編」所有漢人。

至於把玄鐵劍又點？城破之前，「襄陽三子」揀咗冇人做野嘅「重陽假期」，用「最和平」嘅方式亮劍。有好多百姓圍觀。結果冇癱瘓城中經濟。蒙古兵見宋人無反抗意志，叫太守「陸八久」同「幫宋出聲」頭領「呂文煥」打開城門，攻佔了襄陽，將之改名為「香圳」。