今朝過馬路，太陽高照，在遠遠見到一大班人雖然俾太陽曬住，仍然滿心期待盞公仔燈由紅轉綠。

當小路出大路嘅燈位轉為紅燈後，各人身體已準備好迎接踏出馬路嘅一步，冷不防大路嘅車踩油向前，狠狠地輾過佢哋嘅期望。

當我行近馬路口，心中不由得冒出怒火，心諗你班沐咀，有老有嫩，仲有個未夠三個月大，俾佢老母抱住嘅BB。你老母明明企喺個過路燈掣一個身位之外，但就係唔願意撳個過路燈，雙手就留返嚟同自己個BB遮太陽。當然，你係冇義務撳掣，但咁就會換嚟你個B要曬多一轉紅綠燈。

在場其他人都係俾太陽曬到應，面口已經乸埋，雙眼亦睜唔開。佢哋彷彿期望別人會撳掣，只要忍受住齋企唔郁就可以喺轉燈一刻衝過馬路。

我心中嘅怒火，令我直奔去燈柱，再拍一拍個掣，同時面部展示不屑呢班沐咀嘅表情，雖然撳掣係唔需要用表情俾撳，但嗰刻我自覺好X型！

只係一個過路燈掣，只係一段花十步左右就可以橫過嘅馬路，只係一件一伸手就可以觸及嘅事，但在場嘅所有人都心存依賴、僥倖、施捨、等運到同接受現狀嘅心態。就算曬到乸埋口面都忍受住，究竟係出於認命心態，定係對任何嘢都唔抱希望？你俾我過就過，唔俾就繼續 keep 住等 keep 住曬囉，曬住先，冇問題，仲有，唔好阻我返工呀！

強姦式嘅政改已殺埋身，困擾多年嘅中港民生問題、機場興建第三條跑道、普教中問題、深圳香港邊境模糊化等等問題。但可惜嘅係，相信仲有大部份香港人覺得唔關自己事，甚至冇問題，認為顧掂自己個飯碗先啦。此刻，我除了憤怒外，只剩下無言，粗口除外。