早排廣告商一窩蜂抽水，所謂上得山多終遇虎，抽水終抽著火水。

港大生衝入校委員會場，盧寵茂醫生插水抱膝訓低，網友固然多靚抽，當晚改圖即跌即上快靚正，一到第二朝，客戶就出手喇，幸福、美麗華先後Facebook出圖抽水，亦都同日笠水刪Post。

廣告呢家嘢，將軍識條毛，更加唔識人，唔知兩間公司當初係前線同事手快（Approve）推出街，後來中高層淆底丫，定還是出完Post直接受到中間人「溝通」而彈弓手喇，總之原因已不重要，重點是帶出，明明型到爆的一個Feed，變樣衰到冇朋友。無論之前Campaign幾成功，「怯，你就輸一世」，一Q清袋，望望網民劣評恥笑唾棄，真係喊都無謂。

十幾年前還被形容為「政治冷感」的香港，近年急速變成「凡事都政治化」（藍絲術語），究竟有幾多市場／廣告人有政治敏感度，識得評估甚麼事能抽？甚麼人是方丈不能碰（雖知盧醫生乃梁粉呀）？哪個時候會過猶不及成了自我審查？如何為民意把脈同時能摸清政治人物關係？如果我單單作「以個別事件逐次衡量」、「睇多啲政治新聞」作結，我相信讀者會打死我。好啦，姑且整幾個可行做法拋磚引玉：

一）請政治宅大戶網友做顧問 平時品牌會用開KOL（Key Opinion Leaders），多人跟的大戶出圖寫Feed去推廣，其實網上亦有不少評論人貼市，亦對政治形勢有了解，邊啲會過火位得罪方丈、宗教、性別要避，邊啲無大害（笑其他商業機構、港中矛盾），這班人識審時度勢，只要品牌（或廣告公司）定期定量給顧問費，一有新料可叫政治宅顧問能否抽，又或者，平日有Campaign出，想找2nd Opinion幫眼有沒有出事，都可以靠這班顧問，減少自製公關災難。我知，有跨國政治公關公司做開2nd opinion／顧問，佢地MNC價錢不是太多本地品牌畀得起，加上來回時間一定慢過政治宅大戶網友嘛。至於可靠政治宅大戶名單嘛，真的有公司會做才提供吧。　

二）用非官方Page出Feed Option A: 自己公司持續經營隱身Facebook專頁講同品牌無關題目（如藥廠市場推廣經常有提升Non-brand awareness的講座，之後才對醫生谷新藥），不過唔用得好多次，亦用太多人力；或者 Option B: 直接畀錢找現成政治造圖Page大戶（例子是Look7 、樂高製作、溫水劇場、歡迎偷圖等等，其實好多客仔都用開港女老婆、咳神，概念類似，但就擴闊個大膽玩法），透過佢地抽即市時事水借啲意亂入，一來就算出事品牌未至於太上身，二來現成政治Page大戶留意開懂得拿捏分寸（原因如點一），三來笑點中Point好多（你睇下歡迎偷圖張盧寵茂夾欣宜幾爆？），當然，這類長期合作記得預早傾好，簽埋NDA（Non-disclosure Agreement）。

三）咪鬼玩Real Time Marketing 追議題當然易爆，但如果政治判斷不足，或執行上似踩鋼線，又何苦鋌而走險？正如作家，普遍的會追議題（如我），真正高手的能帶動熱話。與其每日部住個網等新議題抽水，倒不如專心做一條好橋爆橋等人評論，近日就有搵周柏豪賣Kotex廣告，唔抽政治火水又可以廣傳。

抽水or not，that's a question of ability and risk。條路自己揀，抽著火水唔好喊。

延伸：抽來也抽去 抽水向來沒有罪

（圖片來源：香港大學學生會學苑即時新聞Facebook）