追隨你的直覺吧！

等等等等，等到花兒也謝了終於天黑，想不到在伊朗首都德黑蘭找間有 WiFi 的 cafe 也不容易。都估唔到首都原來唔係太多人識英文，明明聽佢講 rice 最後變做 fries，以為有得食飯咁好卻是薯條當飯食。結果全日只吃了半筒消化餅同一碟薯條。

有 WiFi 第一時間上 couchsurfing 搵 host。搵其他地方？唔係，想在德黑蘭搵第二個 host。我唔係太鍾意 Khayyam House，其實 Khayyam House 的理念好好，不過我自己唔適合呢種 style。

我渴望係同本地人有深層次文化交流。在 Khayyam House 的 surfers 每日不同，主要係單車仔多，德國人多。Germans, Germans everywhere。單車仔話題主要圍繞落地簽證、延長簽證、過境等，我完全融入唔到。

好不解一個 host 都無覆我，想當年在土耳其伊斯坦堡發出公開的請求，累積超過一百個回覆喎（不過100%男人）。

開始鳩 send，突然有個 host 秒回我！仲係女仔！仲話我可以立即過去佢屋企！我停一停，睇返佢 profile，一個正皮（positive reference）都無，仲咁熱情，會唔會係伏呢？

不過我是個完完全全信直覺的人，今次直覺佢應該係好人，咁就立即同佢話而家執嘢過去。

包住頭揹 backpack 好辛苦，鳩下鳩下企喺路邊鳩等，因為我唔記得的士係點樣。

突然有個靚仔停車！好吧我承認係幾靚仔，所以反射動作咁俾地址佢睇。俾完我就後悔，始終未熟伊朗就玩順風車好似有啲危險。點知呀靚仔同我講好近，叫我上車帶我過去。我見呢個時候條街仲好多人好多車，諗諗下都係好近啫，就上車啦！

就是咁，我第一次自己一個（第一次係同意大利妹喺吉隆坡玩）截順風車，就係夜晚12點的伊朗德黑蘭。



一路上保持警覺，開住 Google Map 睇方向同 text 咗我 host，同靚仔傾計好開心。突然佢問我：「Are you single？」我就 show show 隻無名戒話：「No, I am married。」佢面口立刻有少少變，然後就無出聲直至到達。落車一刻，問我收錢，哈。

來到我在伊朗第二個 host，Azin。

Azin 大我一年，讀緊 master of clinical psychology，獨居，出身小康之家。佢問我點解要離開前一個 host，我老實同佢講 style 唔啱，想轉新環境。佢聽完我形容都覺得唔啱佢，因為我同佢一樣喜歡 1 on 1。東西都未 unpack 就 blah blah blah 講唔停，我分享我做 surfer 的經驗，佢分享佢做 host 的經驗。

不約而同我地都試過同外國人去旅行，佢就提議：「why don't we plan a trip together？」然後一齊睇地圖睇巴士火車飛機時間去計劃！短短半小時已經決定好時間和地點，我想這就是一拍即合。

終於有得沖個靚涼。然後我地瞓同一張床，熄燈，然後係我第一次同外國人 pillow talk，呢種感覺實在太好，唔知你睇字感唔感受到我開心同感恩。

我問佢其實伊朗人知唔知其他人點睇伊朗？

佢話知道其他人都以為佢地係恐怖分子、係伊拉克。身邊九成人知道我去伊朗反應都好負面，有人問我係咪去打仗，其實我覺得唔好笑之餘，仲覺得佢地有啲無知。

因為伊朗真是一個好好、好靚的國家。

適當的擔心其實我理解，因為香港人對伊朗認識好少，唯有希望你一路睇落去，會明白點解我想去伊朗。

延伸：
去伊朗過伊斯蘭齋戒月流浪記#1　#2