又到四年一度嘅世界盃決賽週。難得有返直播，理應安坐家中享受足球賽事——卻深明深夜同時開冷氣同電視加埋嘅耗電皮費都幾溶下。我住喺劏房又鬼咁細，唯有落樓下新起果間酒店黐波睇：大堂廿四小時開放、開行空調：冷氣涼得舒適、梳化坐得招積，簡直係一大享受也。雖然電視機較咗無聲，但勝在螢幕夠大夠高清，唔駛爆格屌那星。

睇世界盃係睇氣氛，雖然係靜咗啲，不過喺酒店大堂睇波又幾舒服。屋企附近又無商場，唔通要去商場門口高溫仰頭睇大電視？仲慘過做高溫瑜珈﹗一於去酒店涼快下。上一屆，我地都喺同一位置間冰室度睇波。

今日，荷蘭殺死了足球。我無睇開波都知，歐洲波都係機械式打法，毫無美感。邊有南美波咁有踢法，咁先係味道。上半場我全程都保持肅靜，直至荷蘭大炒巴西四比一，已經好克制嘅我細細聲壓住喉嚨悶屌咗句：「唔撚係呀嘛！又洛賓？！」

估唔到暗屌一聲，已惹來在隔檯嘆茶的內地客側目蔑視：「甚麼﹖竟然是香港人﹗」，話未講完，就已經一枝箭走到大堂counter，大叫「服務員～～」—— 認真影響剛才睇波嘅興致。不過我無理佢，繼續睇下半場。

無幾耐，一位酒店職員從後拍我膊頭：「先生，請你出去。」

「吓﹖請問係咩事呢﹖」突然被無理驅趕，我當然大感愕然。

「有顧客向我地投訴有人喺酒店大堂睇波喧嘩，話啲方言好吵耳騷擾到佢。」

「喂，佢唔係仲嘈咩﹗佢夠阻住我睇波。」我據理力爭。道理在我手，怕咩？

酒店職員語塞咗幾秒。但之後，我估唔到佢會以公司規定回應：

「唔好意思，公司規矩：大堂只供酒店顧客使用……。」

我當堂靜咗。無錯，我的確唔係酒店顧客。依一處無疑係專做中囯內地旅客嘅地方，並唔係我依亭畀唔起錢嘅「港燦」嚟。

當我轉身想走果陣，我聽到剛才內地客跟同行安坐喺卡座上高談闊論：「你瞧那『港蝗』：來酒店大堂搶資源，這地方是咱們的﹗你們憑甚麼來這﹗去去去﹗」

我耷低頭，一路向前行，無望番轉頭。望住眼前林立嘅一幢幢大酒店，我不禁倒抽一口涼氣：

依度，已經唔係香港人嘅地方。