話說希特拉千辛萬苦，終於儲夠首期，買咗大埔新樓嵐山！今日佢就同經紀一齊去收樓。由於通脹關係，希特拉咁多年嚟儲嘅錢，只可以買到177呎嘅H室。

一打開門，希特拉就覺得呢個單位間隔奇特，似乎係將原本四房的大單位嘅一間房劏出嚟賣，於是就問經紀係咪真有此事。經紀答：「你走佬走咗咁多年，心靈無平安，唔識得分析，人講你就信！」

希特拉之後入到廚房，發現只得13呎！個廚房咁細，點煮德國餐呀？此時經紀好像看透了他的心意，冷不防說了一句：「德國餐？你而家走佬呀，帶埋菲傭吖！」

希特拉行勻全個單位，177呎賣二百幾萬，地點又山卡拉，幾十年儲嘅錢居然只係買到呢個窗台同廚房一樣嘅騎呢單位，口中不禁喃喃自語：「香港嘅地產覇權果然名不虛傳，肉痛呀肉痛……」

經紀冷冷地回一句：「買樓你就買樓啦，嘈咩嘈？成日要出聲，咩都要發聲，仲咩成日要出聲，唔出聲就啞㗎，無得出聲呀……」

希特拉心想今次真係比人鋸到一頸血，忍唔住向住經紀大吼：「無良心！點解你哋賣樓咁無良心㗎！你哋情何以堪！」

經紀：「良心？良心係好危險㗎！你嘅良心同我嘅良心都唔一樣，有人覺得我冇良心，我又無犯法，而家依法賣樓，根本無出現違背良心的問題！」

希特拉頓時語塞，看著眼前呢個豆腐膶，十足十係一個監獄！走咗佬咁多年，就係為咗逃避牢獄之苦，點知山長水遠去到香港居然中伏！希特拉此時眼前一黑，心口一甜，竟然吐出一口血來，昏倒過去。

(youtube 截圖)