7月2日，我如常上班，走入班房，由於學生已經完成考試，現在已經不用教書，學生自由活動。有一位學生走到老師檯問我﹕「老師，噚日你有無遊行呀？」他是一個比班上的同學更好發問的三年級學生。

我答：「有呀，我遊行完，仲有去埋遮打道嗰個預演佔中，凌晨2點先走。你呢？你屋企人有無去遊行呀，Alex（化名）？」

Alex：「無喎。我唔想搞亂香港！再咁落去，激嬲中國，中國會點做呀？」

我：「你覺得會點呀？」

Alex：「中國會斷晒我哋嘅水，唔俾糧食我哋！」

我﹕「佢哋咁盡，唔賣俾我哋，香港咪即刻暴動。到時總有方法解決，所以香港應該興建多啲海水化淡廠，而且要加快。」

Alex：「再係咁，警察呀會開槍射你哋呀！」

我：「到時我畀人射死或者拉去坐監，你要幫我討回公道。但有一日發生咁嘅事，到時先出來阻止就太遲，所以而家就要出來抵抗。由97年開始，香港真係變得愈來愈差，代表香港市民的立法會已經失效，選特首又要篩選候選人。其實政府係要由市民經過公平選舉，先叫做代表市民嘅政府。呢個無香港人授權嘅政府，漠視民意，香港人多次遊行示威，但政府、共產黨都係唔聽唔改，我哋仲可以點樣改變？」

Alex 沉默半晌，心裡好像不服，但又不懂表達。我說﹕「Alex，我知你而家生活得好好，有靚樓住，有會所玩，又有好好嘅屋企人，你想社會安安定定，繼續和平咁生活落去。我希望你唔好咁快就唔再思考對錯，老師也未必一定正確。」

這位小學生的疑問，似曾相識，我不少的成年朋友也會拋下類似的問題，我相信這和大眾的想法相差不遠。是的，誰不想過著安定的日子呢？這樣下去，一時的安定，只換來永遠的傷害。是時候，站出來抗爭，把抗爭一步一步升級，直至有真正的改變。

走筆至此，7月3日黃毓民議員於立法會特首答問大會上，向梁振英擲杯。不知道我學生 Alex 又會怎麼想呢？覺得好暴力？也不出奇，因為連一些自稱為激進政黨的人民力量都要與黃毓民劃清界線，陳偉業議員更建議報警，這簡直就如把人民力量自我閹割一樣，放棄行動升級的宣示，放棄與政府討價還價的本錢，永遠只停留擲紙星星的把戲。

學民思潮留守一整夜於特首辦公室大樓外，7月2日早上，梁振英眼尾都不望一下，就走進大樓，無與示威學生對話。511個示威者於學聯的預演佔中裡被捕及或會作正式檢控，梁振英又無正式回應示威者訴求。

黃毓民一擲，只是展開民間行動升級的序幕。