明朝末年，崇禎帝聽信謠言，將抗清名將袁崇煥收監。以下是二人在獄中的一段對話。

袁崇煥：我起兵抗清是為救大明村民。何罪之有？

崇禎：人哋話你暴力，係「法西斯」。

袁崇煥：此乃勇武抗暴。真正的暴力是入侵大明的滿州人。

崇禎：你搞喊滿州細路女，又踢老翁手推車，仲唔係暴力？

袁崇煥：現在兩陣交锋，咁都算暴力？

崇禎：我話係就係。仲有，有人話你係「鬼」。

袁崇煥：冤枉呀，聖上。

崇禎：咁如何證明你唔係「鬼」？

袁崇煥：自從滿州人入侵大明邊關，其他人都去爭取他國的戶籍。我忠心耿耿，與大明同在，身土不二。

崇禎：有人話你收咗皇大極嘅錢，如何證明你冇？

袁崇煥：誰人屈我辱我？

崇禎：朕嘅「無間道」點可以開名？

袁崇煥：咁聖上又如何証明我有收錢？

崇禎：我對眼就係證據。

袁崇煥：聖上對眼有事，你睇到乜？

崇禎：我睇到你冇去殺滿州人。

袁崇煥：冤枉，你個人喺京師，點見到我冇殺人？你個人冇落塲，聽邊個公公嘅報道？佢哋好偏頗喎！我上陣就係想勇武殺敵。

崇禎：「勇武」二字你不配。

袁崇煥：我守衛山海關及遼東多番退敵，仲唔「勇武」？

崇禎：你冇對準滿州政權。

袁崇煥：連上一個大汗努爾哈赤都係我用紅夷大砲打成重傷而死，你仲想我點？

崇禎：如果你有對準政權，何解新一代的皇太極又生勾勾企喺度，仲改國號大清？

袁崇煥：敵強我弱。「勇武」也不能一下子殺得完。

崇禎：你話袁家軍咁勇武，但又冇殺到新一代揸fit人，即係收咗人錢！

袁崇煥：咁都得？

崇禎：如果你冇通敵，為什麼唔出去殺哂關外所有滿州人？

袁崇煥：你老屈。而家話我冇留喺前線，但如果我上個月唔接受錦衣衛「預約拘捕」，你一樣可以話我「龜縮潛水」、話我「身有屎」！

崇禎：只要有一個滿州人未死，都證明你有收佢哋錢！ 袁崇煥：你個死左膠！

崇禎：膠……？你竟然粗言侮辱朕，你行為太激進，教壞小童！

袁崇煥大叫一聲：我呸！你話就話抗清，其實係「和理非非」。但對我哋呢啲武將真抗爭，你又立即變做「四方西」，乜X都唔得！

崇禎：喂喂喂！你又講粗口！又暴力、又唔勇武、又唔對準政權。聽日拖你出去凌遲處死。

袁崇煥大叫：你咪阻膠住哂！

袁崇煥隨即一掌打死了崇禎，改寫了歷史，從此繼續勇武抗清。

左膠的強盜邏輯之下，除非你認係「大清」嘅內鬼，否則他們永不滿足。