尋日大家都齊撐齊陰，政府已經默默地成功為你爭取到，起條機場第3跑道比你，係唔係好surprise 呢？個個都鬧3跑，大家明唔明發生緊咩事先？

---------------------------------------------------------------------　

1. 機場原先有兩條跑道，點解起第3條？

政府話飽和，好多人搭飛機，又好多貨要運，唔起就輸比其他機場，經濟貿易就衰喎。　

2. 點樣起？

由於香港好撚細，又唔可以海上降落，所以我地首先會喺海上起個人工島，再喺上面起條跑道。又由於要起個島，所以海入邊個D 生物我地會殺哂佢全家。呢層大家唔洗擔心，唔會冇魚食，會運多D大陸魚比大家食嘅。　

3. 1400 億係唔係政府出架?

機管局話起機場係佢地自己個局嘅project，唔使政府出，佢地會自己諗辦法籌旗。但提返大家，機管局係香港特區政府全資擁有嘅機構。　

4. 仆街, 機管局D錢從何來？

機管局籌旗有三個方法嘅。一，機管局黎緊10年都唔使比家用比政府，比少D 家用咪夠錢囉。二，機管局向市民借錢，發債券，機管局遲D 會連本帶利還返比市民，大家抵諗D 啦，借住先囉，大家都有份用。三，機管局增加航空公司收費，同埋日後搭飛機，每人比多180蚊。　

5. 「我地有咩著數先？」

一句講哂，冇。　

-->「起左條跑道，多D 飛機飛，我地可能有平機票去旅行？」，由於個天空嘅空間有限嘅，而家個天空係好鬼逼嘅，「D 飛機飛逼D唔得咩？」，香港隔離有廣州白雲機場，深圳寶安機場，珠海機場同埋澳門機場。張炳良話空域係立體嘅，有D 可以飛高D ，有D 可以飛低D。雖然我唔係SAM 哥，我都相信飛得再高，都冇可能飛上太空啩，咁都有個Limit 架。你幻想下上面好似平時紅隧咁，多車你都係要排隊架。

-->香港唔起就會輸比大陸？大陸而家個個區都起機場，都唔使黎香港轉口，香港起左都輸，橫掂都輸，不如留返個錢第日折墮個時用啦。　

-->起左吸引多D 商家和金融界人士來港進行貿易同投資？吸親都係大陸人，唔想吸囉。　

6. 「咁冇著數，可唔可以唔起？」

一句講哂，唔可以。　

我屋企樓下畫條斑馬線，個區議員都有問我地好唔好，起條飛機跑道點解冇得say no ?由於條跑道係機管局一個project，佢自己籌旗，冇向立法會申請撥款，所以而家唔係問你好唔好，係通知聲你。「垃圾會班垃圾冇反對架咩？」，民主黨話佢地會歡迎起條跑道。(我個腦不停loop：民主黨，賣香港…)　

7. 咁冇著數，政府點解會大力支持？

政府要提供賺錢機會比D 大財團架嘛。留意下最近東涌炒賣豪宅嘅情況，第時起好左條跑道，咪大把人買機場附近D 豪宅囉，大財團又有收入啦。

---------------------------------------------------------------------　

個project係唔係好unbelievable 呢？政府真係無所不用其極，配合中央同大財團…　

你而家係知會我一聲，唔係問我好唔好？

係唔係都要起條跑道，我心理真係好唔平衡。咁大件事都只係通知聲我，我連反對嘅資格都冇。我而家終於都明當初拉姑哭訴，謝檸檬同柏芝結婚唔同佢商量係幾咁傷心，你都唔係娶左老婆先話我知呀。點解仲開記招，點解你唔起好左先通知我。　

又係時候夾錢啦…

我唔明香港地點解樣樣都要夾錢，仲夾得密過舊樓維修，高鐵又要夾，地鐵又要夾，機場又要夾，地鐵加個爛鬼幕門又夾。起舊咁貴嘅野，點解唔搞個慈善mug mug 夜，叫D 為善最樂嘅有錢佬夾條跑道出來？　

橫掂都要夾，我寧願夾個太空發射站出來啦…

而家個天空又咁逼，起左跑道飛機都要排隊。索性唔好起跑道啦，起太空發射站啦不如，隻飛機直接飛出太空，再兜返地面啦，又快。　

PS. 美國成日出錢探索火星啱唔啱人類居住，美國D 人成日話哂錢。我覺得我地起條第3跑道，哂過探索火星，不如將D 錢用來探索下香港仲啱唔啱人類居住？


（圖片來源：NASA）