早喺九月，《相約星期二》喺港鐵登晒海報宣傳。雖則我喺一二年已經睇過「第十度」公演，都忍唔住去買兩張飛睇；而訂飛時，驚覺周末嘅戲飛都搶購一空，好彩撲得「星期二」飛兩張。到咗葵青劇院，人頭湧湧，座無虛席，可見香港舞台劇都有興旺嘅一面。正如演藝學院戲劇學院前院長，鄧樹榮所言：「香港需要長壽劇目，以支持長遠藝術發展。」的確，「第十九公演」，係實力嘅證明，無論叫座力定質素都有保證。

網上有批評《相約星期二》矛盾同張力唔夠，其實係唔了解作者明哲（Mitch）嘅風格。本身個故事係真人真事回憶錄，講明哲喺大學畢業十六年後，得知教授慕理（Morrie）患重病，就約佢星期二去討論人生嘅疑惑，黎面對佢自己忙碌記者人生嘅空虛感。誠如導演古天農所講：「呢個係真實嘅故事。它雖然冇強烈、緊張嘅戲劇衝突，但係真實而令人感動。」

喺情節編排上，睇得出作者同編劇嘅匠心。老人家劇本添上嘅自嘲無能，唔單止為戲劇添上趣味，亦將老年人「咩都無所謂喇」嗰種心態刻劃得入木三分。攙扶老人家個位，亦令我諗起照顧家中長者，昔日情景歷歷在目。原著偏於描寫個慕理嘅機智幽默，而劇場則係兼寫慕理面對死亡嘅嘆息，而對學生十六年後先踐約而有所微言。文字着重描寫感受，而劇場嘅改編就使角色更加立體。出眾嘅演技，使青年嘅空虛、老人嘅無助、人生嘅哲理、精警嘅對白，發揮得淋漓盡致，正係呢套劇精粹所在。

當然，鹹魚百菜，各有所愛。呢種勵志劇目，劇情單調、「講耶穌」多，有人鍾意，都會有人嫌悶，始終呢啲「勵志書」、「哲理書」都唔係個個受落，搬到舞台亦然。齋睇現場觀眾，反應就唔錯，笑位、「催淚彈」，處處受落。

提起觀眾，不得不提「劇場三聲」：笑聲、鈴聲、紙巾聲，聲聲入耳。

笑聲：
香港人睇戲劇，笑點從來都好低。我明白香港有宇宙最高工時，壓力大，需要宣洩；但有啲顯然係老教授用吓自嘲手法，輕輕帶過，唔使捧腹大笑，但唔少觀眾都有理無理笑咗先，笑足全場。其實都幾影響其他觀眾。

鈴聲：
熄電話睇戲係基本禮儀，但喺演出期間，都響過五、六次電話，甚為滋擾。調轉頭諗，咁都反映，呢套戲吸引咗唔少「業餘觀眾」、「睇戲初哥」進場；但香港人嘅睇劇禮儀，仍然有待改善。

紙巾聲：
此劇屬「悲／正劇」，但就算遇上催淚位，眼淚照計無聲。一開頭明哲同慕理喺畢業典禮吻額道別，我料會係劇末嘅伏筆，教全場一片淚霧。點知睇到最後，當我睇到入神，蘊釀眼淚出緊之際，不料右邊嗰位、前邊嗰位、四方八面，都傳嚟將「TEMPO」從膠包裝中抆出嘅「嘶咧」、「嘶咧」之聲，令場面感人程度可以用「嘶咧」次數量化，個場面反而幾好笑。只係希望大家可以抆定紙巾，唔好打擾到隔籬位。

最後都想略談劇本嘅翻譯。原作嘅中文譯本一向為人詬病，但睇得出此劇譯者用「地道香港口語」嘅巧妙，例如將「the day is not so far」等譯為「嗰頭近」等，慕理帶有六十年代粵語講法，老人口吻維肖維妙，明哲嘅「hea」、「走堂」亦十足年青人，為戲劇笑位加二百分。不過，劇中哲理名言都有可以斟酌之處，如「I'm on the last great journey here-and people want me to tell them what to pack」，劇中將what to pack譯為「帶乜行李」走，我以為用「執拾啲乜嘢」會更近本意。而「awareness of death」，劇中係「對死亡嘅明瞭」，始終我覺得明瞭喺口語唔多用，用覺悟或者好啲。

於我嚟講，全劇都稱得上係中上之作。可惜嘅係，《相約星期二》本身著重體現人身哲理，但全劇節奏較快，對白飽滿而唔敢留太多停頓，甚至每一句都講得較快，反而令到焦點聚喺台詞，而演員嘅神態、表情，台詞深意，倒不及原作有空間細味。或者係舞台劇要迎合港人口味，避免冷場，唯有喺短短兩個半鐘，盡現書中各種精華情節、對白。

香港戲劇正需要更多類型嘅劇目，去吸引唔同觀眾去觀賞。《相約星期二》係好成功移殖本港嘅作品。雖然唔係大劇作，但呢套劇或者，會為忙碌工作嘅香港人帶嚟少少親切感，諗起屋企嘅老人家，以及對生命意義嘅一啲啟發。

（圖片來源：相約星期二宣傳海報）