日本鐵路運輸一向享譽國際，出名準時。但近日就有鐵路公司要為不準時致歉，因為有列車唔跟時間表早咗廿秒開車。

總部設於東京的首都圈新都市鐵道，經營由東京秋葉原至茨城縣筑波的筑波快線（TSUKUBA EXPRESS）。本星期二（11月14日），一班北行線列車原定上午9時44分40秒離開南流山車站，但列車在9時44分20秒便駛離車站，提早咗二十秒。

首都圈新都市鐵道即日在官方網站發新聞稿，雖然佢哋無收到任何乘客投訴，但仍對該列車沒有依時開車為乘客帶來不便致歉。

可能香港人習慣晒港鐵遲廿分鐘等七班車都上唔到，但對於依靠鐵路通勤嘅日本，早走咗班車，隨時累人遲到或者造成骨牌效應趕唔切轉車。

(圖片來源：首都圈新都市鐵道網站截圖)