再次執筆寫起讀書報告就係由格Game之神「梅原大吾」所寫嘅自傳《年輕人寫給年輕人的人生攻略本》，最初以為係教你打格Game，但內容真係一本切切實實教大家做人道理，而且當中有好多點都對我地身處香港嘅現況十分有共鳴。

令到我覺得對現況有共鳴嘅係「失敗」嘅睇法，打機可能只係一鋪定輸贏，贏就係贏輸就係輸，好簡單；正如我地一日未抗爭成功，每一次行動其實都可以叫失敗。梅原覺得「只要自己未認輸其實都不算失敗」這一點我十分認同，輸贏係自己嘅定位，放眼去睇到自己嘅錯失同進步，其實贏嘅可能係自己。當然唔好用「階段性勝利」去令到自己覺得「今次都做得唔錯」，完全只係派膠嘅行為。

另一點就是專注力，打咩格Game都好，專注力真係一門學問，而專注力演化出嚟嘅就係「唔好注意他人嘅眼光」，我地一直堅持抗爭，日日都聽到有人叫我地「唔好搞咁多啦……佢唔會理你地架……」，「面對現實啦！」總會有好多人對住我地指手畫腳，即使我地習慣咗，但對住身邊最親嘅人咁講多少有啲唔開心，或者我地成日俾人笑「你睇下班熱狗又做埋啲無謂嘢」。只要努力就一定有成果，依句說話可能同小朋友講會有用，作為一個社會人係十分清楚努力唔一定有成果，但堅持為自己認為啱嘅事而努力，依點絕對唔會錯。

打機又好，工作又好，或者其他更不設實際嘅事，之前所努力嘅未必有成果，或者要經歷好多創傷同失敗都未必有成果，但筆者相信一句：「成功之前，我們絕對不要放棄夢想！」依一點絕對無錯！

（原文刊於第三期《熱血少年》週刊，於2014年8月15日發售。請支持文化抗共，訂閱《熱血少年》週刊：http://www.passiontimes.hk/?view=regform#comic）