Ice bucket challenge 由美國開始，火速經網絡蔓延到港、台。據在下的理解，最先從 Mark Zurkerberg 挑戰 Bill Gates 開始廣為人知，然後挑戰由名人之間傳開。台灣的政、商、娛名人通通被挑戰，香港由娛樂圈名人開始，也有些政治人在玩了。事不過三日，網絡熱熱鬧鬧，熱潮來得快，也崩壞得快，劣拙的模仿、小器的方丈、為玩而玩的無聊人，通通把這原本極有意義的活動迅速貶值。

為甚麼是冰桶？因為挑戰的源頭是為了籌款給 ALS（漸凍人協會，漸凍人症即肌萎缩侧索硬化症，患者肌肉會逐漸衰弱、萎縮，最後完全喪失活動能力），透過一桶冰水淋頭去感受漸凍人的痛苦，繼而捐助他們。當挑戰來到港、台，感同身受這部份被抽空了，只簡化成淋冰水／捐錢，或者又淋又捐，再發展下去，就可能會傾向於為挑戰而挑戰，這個情況已經開始出現。

我剛才又提到有劣拙的模仿，我想講，民建聯的陳恆鑌就自淋了，他有好幾個令人反感的 odd 位：

一、我從片段聽唔到有人 challenge 佢喎，所以我話佢係自淋；

二、他竟然係捐錢畀中國紅十字會。喂，中國紅十字會喎，郭美美喎，幾廿萬一劑喎，你捐俾佢買手袋喎。喂，你雖然係民建聯啫，但係都唔使連捐錢到要咁忠心呀；

三、佢挑戰戴耀廷。挑戰戴耀廷無問題，但係聽佢片段中講，佢係覺得戴耀廷教壞細路（去佔中），叫戴耀廷淋盤冷水清醒一下。佢之後挑戰李卓人同樣都係抽佢政治水，話佢要諗清楚仲有冇收人捐款未交代。呢啲做法咪扭曲原意兼且小家囉。明明大大方方挑戰自己兼做善事，你係都要抽人水，一點大將之風都無。

小器的方丈係陳淨心。話說香港一班插畫家玩野，由冰桶二創出「淋屎挑戰」，畫出來。Cuson、文地貓、謝曬皮都有份玩，咁呢，阿皮姐就畫陳淨心被屎淋喎（Cuson同文地貓都係畫張融），陳淨心小家到呢，話要採取法律行動。

當一件事的意義被抽空，只餘下形式，其形式就會被賦予新的意義。一件事去到令一個文化會被賦予新意義，這是正常的，但現在落入沒幽默感又小家的建制派，就落得如此肉酸下場。在劣幣驅良幣的情況下，冰桶勢必極速膠化。我等緊 689 自淋。

對於有人要挑戰自己又做善事，當然無問題。我要思考的是，what next？我們要問，冰淋了、錢捐了，之後呢？等下一個 gimmick 才做善事？ Ice bucket challenge 最重要的元素是「感同身受」，港台得其形而不得其髓，勢必淪為一閃即逝的潮流，一個月後，大家笑一笑，再沒有人關心錢捐了給誰。

我要挑戰的是整個關於「做善事」的心態。捐給 charity 是容易，而且也算是有效的。但上述提及的精髓「感同身受」，用基督徒熟悉的詞語講叫「道成肉身」，乃是「進到問題所在、感受問題所在，甚至浸沒於問題之中」，是一點也不浪漫的同行。長期地和有需要的人同行，才是真章。Gimmick 有用，可以喚起關注，但要使關心 sustain 才是 real challenge。

最後貼一段齊澤克的影片，講做善事的。你不用同意他，但值得我們思考。