有晚，單眼佬鹹鹹濕濕咁攬住我，話要搞嘢。畀佢搞到慶烚烚，我都想嚟，不過我要佢帶袋，點知佢話搵唔到，想「不設防」喎，我即時推開佢 say no：「唔得呀，危險期。」

單眼佬攬番住我：「唔使驚啦，有咗又點喎？政府都叫我哋生多幾個啦！我藍絲帶嚟嘎嘛，點可以唔跟啫，嚟啦……」

我拍咗佢一下：「你就講得輕鬆，都已經生咗阿堅同蚊蚊啦，仲要成支籃球隊喎，你養得掂嘎嗱？個政府係唔會資助籃球隊嘎喎……」

單眼佬：「唔使愁吖，我做藥房嘎嘛，之前賣奶粉都執落唔少。雖然近排生意差咗，但我有賣番『淫賤不能移』，頂得住嘅。」

我扮嬲：「仲賣埋啲咁嘅嘢！？你唔賣嗰排，先至有阿堅咋。『生仔冇屎忽』呀，仲唔識死……」 

單眼佬笑淫淫咁回答：「咁咪生女囉，我鍾意囡囡！」（依家諗番起，呢句真係可圈可點！）

我：「咪搞！家陣香港生女好危險嘎！」

單眼佬：「唔係呀嘛？有幾危險呀？」

我正經咁答：「嗱，唔好計爭床位，香港已經男少女多，一出世就注定要同人爭男人；不過你睇我都幾四正，又唔好使驚呀女會爭輸畀人。但係生得好似蚊蚊咁精靈咩，又會畀人說去拍寫真。著得少衫尐，擺啲性感 pose ，又畀人指住嚟鬧。到大個尐入學校讀書，出咗乜事學校又唔會理；啲乜嘢『贏在起跑線』呀、普教中呀、畀大陸人霸哂啲學位呀……，都已經夠頭痛，呀女一個唔生性，學人走去援交，咁點算呀？生性又死喎，走去搞社運，畀班黑警撳落地，搞到成面血，居然返轉頭會畀人屈『胸襲』！你睇下我吖，37E 呀！呀女冇我咁勁，點都會有 35C 啩！？畀啲黑警睇中，捉咗返差館強姦，咁就真係渣都冇喇！如果高竇得滯，四十歲都嫁唔出，做埋剩女……」

講到呢度，單眼佬都已經「墮咗一半」，佢諗住揸我對「攻擊性武器」，撻番著我哋嘅「戰鬥意慾」。就喺呢個時候，蚊蚊乍醒，喊住走出嚟：「媽媽，媽媽，有隻怪獸追住我噴鉛水呀……嗚……」

我走上前睇，原來瀨咗尿，我嗰陣一時感觸，乜都唔理，抱住蚊蚊，自言自語咁同佢講：「阿女唔使驚，你都係快尐瓹返番入去我嗰度喇！香港真係好危險嘎！」

（圖片來源：電影《整蠱專家》截圖）