深受香港球迷愛戴的英格蘭國家隊，今日（7月7日）將會在世界盃8強戰出場，硬撼今屆異軍突起的瑞典，賽前兩國名宿碧咸及伊巴謙莫域，就先於網上打賭。

伊巴謙莫域及碧咸兩個球壇經典，昔日就曾於國際賽交手，而兩人亦先後於曼聯、AC米蘭、洛杉磯銀河及巴黎聖日耳門搵食，甚有淵源。已退出瑞典國家隊的伊巴謙莫域就率先向碧咸挑機，指如果英格蘭今晚勝出的話，就請碧咸食晚飯，更可以任揀地點，但如果晉級是瑞典的話，碧咸就要去瑞典名店IKEA買他想要的東西。

碧咸亦都樂於接受挑機，指如果瑞典贏出的話，會親自帶他到IKEA，買他在洛杉磯的新居所要的任何東西，但一旦英格蘭過關，就要伊巴身穿英格蘭波衫，去倫敦溫布萊球場睇波，並在半場享受一客炸魚薯條。

究竟誰勝誰負，要等今晚先分曉，但暫時的贏家應為IKEA，他們已經率先抽水，在Twitter轉發了兩人的留言。