港鐵「又」加價，佢真係同稅局一樣，最鐘意係乞衣兜度拎飯食。當我仲供緊我分左24期，而24個月內已經爛咗嘅爛電腦，財政緊拙過埃塞俄比亞政府嘅呢個月尾，港鐵再次挑釁我。再加價，我月尾都真係要預備定件 one piece 游水衣，游過對面海返工架啦。

早排網上有個類似懷念過去的 Facebook 相集，show 咗張小童20蚊儲值車飛，咁岩有個10歲嘅死靚仔上我屋企玩……

死靚仔：張飛點操作架？
我：好似八達窿咁囉，100蚊扣到冇為止囉。
死靚仔：扣到得1蚊個時，冇得增值係唔係唔用得？
我：唔會架，你得返1仙，都會畀你過架，你可以搭去邊都得架……
死靚仔：咁佢咪好蝕？

「死靚仔」咁講，真係「一言驚醒夢中人」，我黯然過家燕媽媽，因為那個年頭，我搭緊嘅係「仲肯蝕咗畀我」的「地鐵」。


__________________________________________



「舊屎」地鐵未有真屎個時呢……

• 仲會因為用張剩返1豪子飛過海而覺得咩都抵返哂。
• 20 蚊小童飛係夠一個星期返學放學。
• 冇幕門個時，架列車飄出來嗰野，只要我迎面同架列車 say hi，我啲頭髮就可以 PANTENE 般柔順地吹起。

唔知由幾時開始……

• 張八達窿山窮水盡嗰時，會發出剌耳的 DOOOOO 聲，提醒我呢個窮人「又冇錢啦你」。
• 著住套校服排隊交20蚊證明你係學生，施捨你用學生價。
• 起多個幕門，都要我地籌旗籌幾年。整個「慈善星輝耀港鐵」，叫班有錢佬出啦，點解叫我地夾呀？夾完錢又要畀個幕門夾。
• 個個站都有好多好多舖頭，以前MK站E出口點會咁窄，而家個MK站，就好似塞晒勁多脂肪的心臟血管一樣，真係次次喺嗰度殺出重圍，上到地面嗰刻，都覺得自己好似幫MK個E出口完成咗次通波仔手術一樣。

我真係問題天天都多……港鐵個個「可加冇減我哋冇得揀」機制條 formulae 點樣計？啲「故障」點解唔推出10送1套餐？好似7仔儲印花咁，10次故障「送我一程」，成日故障，都「送下我上路」，我條氣先順返啲呀。

我強烈要求朝早開放維港畀我游水過對面海返工，有益身心之餘，又可以唔使蝕畀港鐵。可能仲有機會發掘到啲適合參選奧運游水項目嘅打工仔，香港打工仔趕時間返工嗰時，真係快到冇影架。我怕月尾維港迫滿無錢搭港鐵返工啲打工仔渣，so sad。


（本文原載於作者面書專頁）