日本鐵路運輸一向出晒名時間準服務好，不過再鋒利嘅刀都會有生鏽嘅一日。日前就發生列車未到，但車站已經熄燈拉閘收工嘅奇聞。

JR九州昨日（4月22日）公布一宗事故，事發於同日凌晨1時38分，一列臨時特急列車駛至大分站時，乘客落車竟發現車站已經收工，月台與閘口附近照明熄滅，連出入口都上埋鎖，認真大整蠱。總共216名乘客最終由保安員帶領到自動閘機離開車站，當中有15名乘客需要辦理補票手續，則由列車車長處理。

JR九州大分支社表示，涉事嘅臨時列車路線由博多至大分，主要接載福岡市睇完搖滾樂團ONE OK ROCK演唱會嘅群眾。發生車站準時落閘唔等人嘅原因，係因為3月17日更改咗班次時間表，大分站尾班車抵達時間比以往提早約一小時，但今次嘅臨時班次資訊未有適當地傳達畀車站職員延遲收站時間。大分支社對此表示歉意，會指導員工改善並且承諾無下次。