近日熱話，「MK青年大戰強國人」片段，有 pair 大陸父母，在旺角西洋菜南街抱住個細路便溺，有個MK仔影低，大陸父母搶相機，同MK仔動口兼動手。

對於此事，我再次百思不得其解：

1. 1987年的《富貴逼人來》，肥姐同董驃全家移民去加拿大，佢哋個女係飛機上面「內急」，好多人排隊等去廁所，董驃提議畀個膠袋個女痾。肥姐即時回應：「你都痴線，咁冇家教，排隊」。27年前的香港電影，大家都有共識，隨街痾係冇家教。今時今日仲有大陸人當街當巷痾，呢件事係唔係證實到香港人同大陸人的思想最少有27年差距？
   
   
2. 大家如果冇睇港產片，實有睇過古裝。楊過行走江湖，都唔係到處有茅廁，但楊過都會搵個草叢，識得用條草遮一遮。老老實實，有人望住我，爛屎都變縮便，我真係即時冇晒便意。Pair 大陸人係旺角西洋菜街，人來人往，冇遮冇擋，點解你會痾得出？
   
   
3. 新浪網新聞中心以「對於小孩子在街頭小便，你的態度是？」為題，詢問大陸網民對於小孩在街頭小便的意見。「當街當巷可唔可以痾？」同「去銀行可唔可以打劫？」，呢兩個問題對我來講都係肥姐個回應：「你都痴線」，邊個咁智障仲要開口問？擺明唔得啦。

大陸人去到世界各地都拎晒人地啲獎學金，點解公民教育呢課咁低分？

而家就同大陸人上返堂公民教育課：

1. 如何應付你小朋友「內急」？

香港人從來唔係唔體諒你小朋友「內急」，我哋係唔體諒你為人父母唔識教細路。出街前痾清佢得唔得？食完飯唔係好急都痾一痾得唔得？唔係下下都要急到下一秒核爆先百米賽跑咁衝入廁所的。

2. 幫你細路「抿」屎前，先「抿」乾淨我哋塊地。

好啦，你個小朋友真係急到瀨屎啦終於，你幫你細路「抿」屎前，請先「抿」乾淨我哋塊地。香港人拖隻動物出街，隻動物痾咗，我地係會「抿」返乾淨我哋塊地，因為對於我哋嚟講，香港是我家，我珍惜隻狗個 pat 的同時，我都好珍惜香港每一「忽」。

3. 香港人點解會怒髮衝冠？我哋係幫緊清潔工人討回公道。

有大陸人話香港人冇人性，唔體諒細路「內急」。坦白講，香港人有個「體諒人排行榜」，而首位係留畀掃街個清潔工人。你痾得好舒暢嗰時，有冇體諒幫你「找數」的清潔工人，人哋日日執「金」難唔難受呀你答我？香港的每一「忽」都唔止一個人使用，我地 keep 住塊地乾淨，係因為我地知每一「忽」都有下手用家，你咁痾，你有冇體諒下手用家先？

4. 如果你忍耐力只屬輕量級，請你需要時用上「屎尿片」。

我知講完咁多，啲大陸人都總會話，人有三急，唔痾唔得。咁我強烈建議你使用返強國出產的「包大人」，我諗只有「屎尿片」幫到你地哋。

P.S. 大陸人發起6月1日罷來香港自由行，我知道大家都熱烈期待6月1日的來臨。跪求大陸人講過算數，記得找數。如此同時，我想申請七一個煙花改係六一放，冇自由行真係要賀一賀佢，但我又唔想政府再晒錢，麻煩調一調個 schedule。好似《地球1小時》咁，一年一度熄下燈，畀返日我地回一回氣。我想個日唱返首《喜氣洋洋》，真係要「熱烈地彈琴熱烈地唱，飲多杯勝嘅各位乾杯飲勝，喜氣洋洋，洋溢四方……」

再P.S. 係呀，我成篇都講屎屎尿尿，我講你都覺得我核突，點解有人可以係旺角西洋菜街中央做出來？


（本文原載於作者面書專頁）