反服貿的學生昨晚攻入台北行政院之後，被不少人認為是暴民，更有指他們在行政院內搗亂，昨晚有份參與佔領行政院的香港旅台留學生王同學，今晚接受本台節目《熱血政治》時稱以上皆非事實。未有被捕的王同學聲言將會重返立法院，繼續參與抗爭行動。

未預料警方突然強硬

之前已經有參與佔領立法院的王同學，稱猜不到警方會那麼快便清場：「冇估到，第一我哋係觀望，其次係第一隊衝入去之後，好快已經有警察喺忠孝東路外面嘅大鐵閘攔阻，但由於群眾太多，大家都嗌『撤退』或『警察退下』，俾到壓力警察放行，冇人估到佢哋突然變得咁強硬。」

否認參與者破壞行政院財物

對於有報導指佔領者於進入行政院之後大肆破壞，王同學亦作出否認：「裡面返出嚟嘅人，都話冇搶掠到機密文件，當然佢哋係有入到去，不過話破壞，話搬電腦咁誇張呢，咁我就見唔到有。」

警察請走媒體後行動

回想到當時清場情況，王同學指未想過會被暴力對待：「其實裡面嘅學生同民眾好有秩序，好有紀律，面對警察，大家都係坐喺度，手撓手，跟住瞓喺地下，其實都係等畀人抬。喺凌晨兩點鐘之前，都係普通警察，對我哋 OK，冇乜惡意，大家你眼望我眼。之後開始換成鎮暴警察，事情就變得唔太一樣，就開始拉人，拉開我哋抬去後面。我親眼見到嘅係，佢哋會將所有媒體請走先，請走之後佢哋就清場喇，佢先問我哋走唔走，唔走嘅話，就將我哋拆開，之後將我哋抬去警察陣營嘅後面。企喺建築物上面嘅人，佢哋都一路有拍攝，同埋聽到：『警察唔好打人』。不過真係冇人諗得到，當初大家會諗警察會讓步，我哋期待會好似喺立法院一樣咁。」

參與學生出現分歧

對於有報導批評為佔領行政院的人為暴民，認為升級並不妥當，王同學亦承認參與者出現了分歧：「大部分都係支持佔領立法院，但係行政院嗰邊就比較分裂。因為媒體嘅取態好明顯，大家亦都唔會好理會媒體報導，不過我哋最在意係自己陣營裡面，原先支持我哋嘅同學，都覺得佔領行政院好粗暴。」

鷹鴿兩派鎮壓後變得和諧

王同學亦承認，佔領行政院嘅「鷹派」，與同留守喺立法院，相對溫和嘅「鴿派」人，分歧相當之大，不過自警方武力清場後，雙方變得相對和解：「其實分歧大，原來想搞個消息發佈會，但『鷹派』話等唔切，突然間喺佢哋fan page，又或者各種渠道，召集咗一批人衝過去，就連我哋都估唔到，所以警察就嚟唔切布防。佢哋個分歧係大架，『鷹派』就覺得『鴿派』嘅領袖唔能夠帶領大家，有傳言話要罷免或取代。不過『鷹派』領袖魏揚同學被捕之後，不論邊一派都同一聲援魏揚，話呢個係和平佔領，唔應該用鎮暴警察去鎮壓，我只能猜測，因為呢件事，令兩派和諧番好多。」

相信抗爭運動會持續

對於今次反服貿運動的未來發展，王同學就認為可以持續落去，原因有三，首先是物資相當充足，其次是鎮壓事件發生後，輿論都偏幫學生，加上逐漸有很多科系加入罷課行列，除非警方再一次清場，否則看不到理由會結束運動。