代糖夫人，

小妹係第一次寄信俾妳嘅心煩人。今次好大鑊牙。妳上次叫我有樓先摸胸，我就無再同果個無樓嘅男仔A君出街同摸胸喇，呢排同咗一個有樓嘅男仔B君出街。新年果晚我地出去飲野啦，情到濃時佢想摸胸，我問：「你有冇樓架！」佢話：「有！而且係豪宅嚟！」但去到樓下，佢一時唔記得帶鎖匙，叫我喺老人院門口之前同佢做住先。我果下咪信咗佢囉。

點知果晚俾人影低咗，依家上哂報牙，點算好牙。A君今日whatsapp我，問我果幾張相裡面果個係咪我。佢仲話佢已經搵到另一個女朋友，話自己無樓但係起碼唔會打野戰喎～我好唔開心牙，我果下發現自己仲鍾意佢，好唔鍾意佢有咗第二個，我應該點做好？

心煩人上

******************************************

心煩人：

嘩心煩人，你知唔知騙徒嘅手法層出不窮，唔單係指女仔化妝同落妝嘅分別架。摸胸前梗係要買樓啦，但有冇樓邊個知呀。梁朝偉同劉德華講，我係警察；劉德華冷笑一聲：邊個知呀？

幾L多男仔去玩果時話自己住維多利亞壹號呀，然後帶你返到樓下就話無帶鎖匙，不如喺後樓梯搞住先，扑完就一起解散，有冇樓，邊個知？整色整水，咪呃到你袋住先，俾人係野外食左囉。無樓就扑野，咪好似未有民主，就信住個承諾高呼「回歸」班白痴愛國「知識份子」咁囉——有冇民主，最後邊個知？

同你扑野果個B君，怕且都係買唔起樓嘅芸芸眾生之一。你兩個喺戶外扑野，其實都算係面向地產財閥嘅抗爭，強烈控訴後現代資本主義社會對性行為嘅「物化」同空間管制。所以A君問起，你咪話你「抗爭」緊囉。抗爭者頭上有光環，做咩都得。何止戶外扑野？偷食偷到返屋企，俾個正印發現，又得；舊愛係政壇中伏，馬上出來數臭佢又得，總之妹妹你都做返個奇女子，世人嘅目光係仁慈好多。

由狄娜到叶露西一系列奇女子，做間諜又有光環，正式係一路做雞一路起貞節牌坊。B君聽到你係老人院面前原來係進行緊一個咁偉大嘅社運工程，佢無理由嬲你掛，仲可能會改觀添。你係咪真係抗爭，無關係格！你事後「論述」一輪，扯埋女性主義、女權、平權、性別平等之類一堆詞語，一野車埋去，佢就多數收皮，可能仲會煮個面俾你同A君食添！

至於你話你發現你仲鍾意A君，但依家人地有咗第二條女喎。你自己都周圍食，巧巧jack，介介jack，食到上哂報，你又有咩資格唔鍾意人地周圍食呀？人地officially同你無關係架。人地走，唔使搞退戀公投架，大學學生會都唔係奉旨入你個學聯賊竇啦，A君又唔係同你拍拖，你唔鍾意都要睇下自己咩身世啊。

其身不正，何以正人？（呢句唔明skip咗佢啦）賊竇個秘書長都唔係普選嘅，濫權嘅、小圈子選嘅，但佢哋又叫中共叫香港要普選喎；你自己又唔係聖女，又有咩stand去期望A君係痴心情長劍啊。當然咁諗嘢都唔係唔得，矯情矛盾咗少少者。

A君你就唔好諗喇，佢又冇樓，摸胸好麻煩，第時一個唔好彩又要係外面摸，又俾人拍低。不如諗下，以妳咁嘅潛質，依家又紅咗，有冇打算加入社運圈做婦權主義者？

PS：牙牙牙牙你老母咩。「呀」字同「牙」字係兩回事來架傻豬。
代糖夫人上