前香港回歸百年，有個以當房奴為生嘅廣東省深香市人（註1）。話說有一日，他去咗行山，沿山路慢慢咁行，唔記得行咗幾遠同幾耐。回神嘅時候，已經身處一片香樹林，叢林茂密，當中無其他雜樹，地上青草鮮嫩，到處都係草木芳香。房奴覺得好驚訝，繼續向前行，想行到樹林嘅盡頭。

行過咗香樹林，見到一座大山，山上有一個洞仔，佢伸個頭入去望，隱隱約約好似有啲光。房奴於是行入個洞，起初條路有啲窄，只有一個身位，令他想起平日返工迫廣鐵（註2）嘅情況，又走咗幾十步，突然變得豁然開朗。塊地平坦寬闊，無篋神周圍橫衝直撞，亦都無緊接嘅金舖藥房，只有整齊嘅屋仔。啲路仔縱橫交錯，啲人來來往往，面帶笑容，村中嘅老幼好似好疏肝咁，不過佢地嘅服飾打扮就有啲怪異。

村民一見到房奴，就問佢：「你邊度架？」但房奴聽唔明，原來村民講嘅係失傳已久嘅方言，於是德高望重嘅村長講：「妮市殕猶埃篇奶？」（註3）房奴仔細咁答咗佢嘅問題，有人更請個房奴到自己屋企，設宴去款待佢。其他村民收到風，於是都嚟八卦下。村長好詳細咁講佢地嘅祖先係為咗避過蟲害，於是攜老扶幼，黎到呢個與世隔絕嘅地方，從此就唔再出去，同外界斷絕來往。

啲村民問依家外面嘅香港變成點，竟然唔知香港已經無咗，早就唔再係特別行政區，而係跟深圳合併咗，變成廣東省其中一個市，改咗個名叫「深香市」。更加唔洗講，啲村民完全唔知粵語已經失傳，全國唯一流動嘅語言係共語（註4）。房奴將自己所知嘅都一五一十講晒出黎，村民個個聽到都頭耷耷，眼濕濕。之後村民又輪流請佢去家中作客，盛情款待。房奴留咗幾日之後，要返歸。臨別嘅時候，村民同佢講：「你千祈唔好同外邊嘅人講呢度嘅事。」村長又嚟翻譯：「妮韆頑憋根埃篇狄淫雪傘女狄屎。」

房奴離開咗香樹源之外，搵得返條路，沿路行返出去，仲一路行一邊留低標記。入返市區，就去市委書記度報串。書記一聽到，扯晒火，即刻派人跟個房奴去搵，佢地沿住啲標記，竟然蕩失路，點搵都搵唔到通去香樹源嘅路。

台灣人史官倫，係食飽飯等屎痾嘅網民，聽到呢件事，快樂無窮咁度期，諗住去搵下。但結果唔成事，因為見佢係台灣人，連境都唔佢比入，佢仲要被屈係要去東莞叫雞，結果行政拘留咗兩年。自此，就無人再提香樹源。


^{註1：公元唔鬼知幾多年，香港及深圳合併，變成廣東省其中一個市仔。}

^{註2：深香市建立同年，港鐵歸入廣州鐵路。}

^{註3：不標準的普通話「你是否由外邊來」。}

^{註4：一種由普通話演化而成嘅「全國共用語言」，所以又簡稱「共語」，坊間另一種講法係「共產黨用嘅語言」或「共匪語」。}

後記：
首先要畀返 Credit 比陶淵明寫嘅《桃花源記》。我好明顯就係參考咗，我甚至乎唔介意話我係抄襲。因為無論結構、內容、中心思想，其實都同原作無乜分別。

而我用口語寫呢篇文既原因，其實係我對普教中的回應，正如上次寫咗篇文言文去側面回應文言範本呢個議題。我地用嘅口語，已有好多學者指出可以追溯返去周朝，無論你讀乜鬼野古文都好，用粵語嚟讀更加傳神，因為有唔少都係粵語講法；讀乜野詩詞歌賦，用粵語嚟讀更加流暢，因為更押韻同合平仄。你試下將我篇文改晒為普通話，你就會知有幾無癮。

（圖片來源：coolgar@flickr）