一看到標題，你大概有兩個想法：1）「梗係喇，我哋係中國人，而家有飯你食，梁振英做得好好呀，只係有啲人日日無事做喺度搞事……」；2）「我屌你呀，你痴撚線㗎，有多幾個香港仲點掂呀，你仲嫌香港唔夠亂咩？」

有呢兩個想法嘅人，係一般香港大眾嘅想法，佢哋好希望香港好似以前咁安安定定，有工返，生活無憂……當你的話題提到政治，開個政治人物政策嘅玩笑，想幽一默，但對方就會話你做乜講政治，繼而又開火……

經過上年嘅佔領運動，香港進入咗一個新嘅時代，越來越多人睇清楚香港政府嘅不堪，會多咗去了解社會發生嘅事；然而，政府太明白香港人嘅普遍性格，冇抗爭嘅決心，立場不鮮明，易被動搖，不能接受自己思維以外嘅思想，對不同思維的人就定性他人為痴線……好多好多。

一個梁振英，就令香港進入一個前所未有嘅時代。梁振英為香港帶來一個共產黨管治模式，例如打壓新聞自由、進行思想教育、權貴勾結、要人民鬥人民、嚴人寬己， 等等等等。佢嘅手法係破壞香港一直以來嘅文化，而佢起用嘅政務官員，大部分都名不見經傳，而處理政務嘅能力大家都有目共睹。而議會裡，亦出現咗大量出現了鍾樹根、吳亮星等呢類不知議會為何物嘅議員，令人側目。

香港市民見到呢啲人嘅感覺係，嗰一刻好憤怒，會出去表態；之後就會講，係咁㗎喇；再之後就會講話呢啲人影響唔到我嘅，包融下喇，做實事喇。一個689，一個痴根，開頭會令我哋評論得好熱烈，之後，見得多無感覺，因為慣以為常……呢一種洗腦方法，喺香港係行得通，因為香港人出名和平、理性、非暴力。

其實我講話想要更多梁振英，係要衝擊香港人根深柢固嘅思維，因為一個梁振英，香港人會憤怒一陣；如果有更多不同嘅689，加強破壞香港嘅社會文化，咁先可以（可能）令香港人更加憤怒，先有機會推翻呢個制度。

我唔係黑心，我係真心相信要有更多梁振英之流嘅人先可以將香港人推去一個從未去過嘅臨界點。